hijr karte yā koī vasl guzārā karte
ham bahar-hāl basar ḳhvāb tumhārā karte

ek aisī bhī ghaḌī ishq meñ aa.ī thī ki ham
ḳhaak ko haath lagāte to sitārā karte

ab to mil jaao hameñ tum ki tumhārī ḳhātir
itnī duur aa ga.e duniyā se kinārā karte

mehv-e-ārā.ish-e-ruḳh hai vo qayāmat sar-e-bām
aañkh agar ā.īna hotī to nazārā karte

ek chehre meñ to mumkin nahīñ itne chehre
kis se karte jo koī ishq dobārā karte

jab hai ye ḳhāna-e-dil aap kī ḳhalvat ke liye
phir koī aa.e yahāñ kaise gavārā karte

kaun rakhtā hai añdhere meñ diyā aañkh meñ ḳhvāb
terī jānib hī tire log ishārā karte

zarf-e-ā.īna kahāñ aur tirā husn kahāñ
ham tire chehre se ā.īna sañvārā karte

hijr karte ya koi wasl guzara karte
hum bahar-haal basar KHwab tumhaara karte

ek aisi bhi ghaDi ishq mein aai thi ki hum
KHak ko hath lagate to sitara karte

ab to mil jao hamein tum ki tumhaari KHatir
itni dur aa gae duniya se kinara karte

mehw-e-araish-e-ruKH hai wo qayamat sar-e-baam
aankh agar aaina hoti to nazara karte

ek chehre mein to mumkin nahin itne chehre
kis se karte jo koi ishq dobara karte

jab hai ye KHana-e-dil aap ki KHalwat ke liye
phir koi aae yahan kaise gawara karte

kaun rakhta hai andhere mein diya aankh mein KHwab
teri jaanib hi tere log ishaara karte

zarf-e-aina kahan aur tera husn kahan
hum tere chehre se aaina sanwara karte

Videos
This video is playing from YouTube Videos
This video is playing from YouTube Obaidullah Aleem

Pachas Sala Intekhab"