Subscribe to our newsletter and get our newest updates

Ejaz Gul

  • Ghazal


zara batla zaman kya hai makan ke us taraf kya hai


zarā batlā zamāñ kyā hai makāñ ke us taraf kyā hai
agar ye sab gumāñ hai to gumāñ ke us taraf kyā hai

agar patthar se bikhre haiñ to āḳhir ye chamak kaisī
jo maḳhzan nuur kā hai kahkashāñ ke us taraf kyā hai

ye kyā rasta hai aadam gāmzan hai kis masāfat meñ
nahīñ manzil to phir is kārvāñ ke us taraf kyā hai

ajab pātāl hai darvāza o dīvār se aarī
zamīñ-andar-zamīñ be-nishāñ ke us taraf kyā hai

tah-e-āb-e-ravāñ suntā huuñ ye sargoshiyāñ kaisī
sukūnat kis kī hai aur āstāñ ke us taraf kyā hai

samajhte aa rahe the jis ḳhalā ko shahr-e-gum-gashta
vo shai kyā hai ḳhalā-e-be-karāñ ke us taraf kyā hai

nahīñ khultā ki āḳhir ye tilismātī tamāshā sā
zamīñ ke is taraf aur āsmāñ ke us taraf kyā hai

zara batla zaman kya hai makan ke us taraf kya hai
agar ye sab guman hai to guman ke us taraf kya hai

agar patthar se bikhre hain to aaKHir ye chamak kaisi
jo maKHzan nur ka hai kahkashan ke us taraf kya hai

ye kya rasta hai aadam gamzan hai kis masafat mein
nahin manzil to phir is karwan ke us taraf kya hai

ajab patal hai darwaza o diwar se aari
zamin-andar-zamin be-nishan ke us taraf kya hai

tah-e-ab-e-rawan sunta hun ye sargoshiyan kaisi
sukunat kis ki hai aur aastan ke us taraf kya hai

samajhte aa rahe the jis KHala ko shahr-e-gum-gashta
wo shai kya hai KHala-e-be-karan ke us taraf kya hai

nahin khulta ki aaKHir ye tilismati tamasha sa
zamin ke is taraf aur aasman ke us taraf kya hai


Source: Book : Mauj-e-shafaq (Pg. 25) Author : Dr. Gopal Krishn Shafaq Publication : Dr. Gopal Krishn Shafaq (1995) Edition : 1995 Book : Mauj-e-shafaq Author : Dr. Gopal Krishn Shafaq Publication : Dr. Gopal Krishn Shafaq (1995) Edition : 1995

Leave a comment

+