rāhat-e-nazar bhī hai vo azāb-e-jāñ bhī hai
us se rabt-e-lazzat bhī aur imtihāñ bhī hai

fāsle miTe bhī haiñ aur kuchh baḌhe bhī haiñ
ye safar zarūrī hai aur rā.egāñ bhī hai

umr-bhar kī uljhan de ek pal kā nazzāra
terā ġham haqīqat bhī aur be-nishāñ bhī hai

terī mīThī bātoñ meñ jhiil jhiil āñkhoñ meñ
aag bhī sulagtī hai dard se amaañ bhī hai

tai kareñ to ham kaise fāsle dil-o-jāñ ke
ek ye anā kā pul apne darmiyāñ bhī hai

laakh maiñ tujhe bhūlūñ laakh tū mujhe bhūle
ek rishta-e-benām apne darmiyāñ bhī hai

ishq-e-dil meñ tuġhyānī barf barf hoñToñ par
sar-phirī bhī hai chāhat aur be-zabāñ bhī hai

terī zindagī sargarm merī zindagī uljhan
raqs meñ bhī hai ḳhvāhish aur sargirāñ bhī hai

'shām' jaane kyuuñ ham ne sī liyā hai hoñToñ ko
varna apne hāthoñ meñ vaqt kī inaañ bhī hai

rahat-e-nazar bhi hai wo azab-e-jaan bhi hai
us se rabt-e-lazzat bhi aur imtihan bhi hai

fasle miTe bhi hain aur kuchh baDhe bhi hain
ye safar zaruri hai aur raegan bhi hai

umr-bhar ki uljhan de ek pal ka nazzara
tera gham haqiqat bhi aur be-nishan bhi hai

teri miThi baaton mein jhil jhil aankhon mein
aag bhi sulagti hai dard se aman bhi hai

tai karen to hum kaise fasle dil-o-jaan ke
ek ye ana ka pul apne darmiyan bhi hai

lakh main tujhe bhulun lakh tu mujhe bhule
ek rishta-e-benam apne darmiyan bhi hai

ishq-e-dil mein tughyani barf barf honTon par
sar-phiri bhi hai chahat aur be-zaban bhi hai

teri zindagi sargarm meri zindagi uljhan
raqs mein bhi hai KHwahish aur sargiran bhi hai

'sham' jaane kyun hum ne si liya hai honTon ko
warna apne hathon mein waqt ki inan bhi hai