Subscribe to our newsletter and get our newest updates

Dil Shahjahanpuri

  • Ghazal


mayus-e-azal hun ye mana nakaam-e-tamanna rahna hai


māyūs-e-azal huuñ ye maanā nākām-e-tamannā rahnā hai
jaate ho kahāñ ruḳh pher ke tum mujh ko to abhī kuchh kahnā hai

khīñcheñge vahāñ phir sard aaheñ āñkhoñ se lahū phir bahnā hai
afsāna kahā thā jo ham ne dohrā ke vahīñ tak kahnā hai

dushvār bahut ye manzil thī mar miT ke tah-e-turbat pahuñche
har qaid se ham āzād hue duniyā se alag ab rahnā hai

rakhtā hai qadam is kūcha meñ zarre haiñ qayāmat-zā jis ke
anjām-e-vafā hai nazroñ meñ āġhāz hī se dukh sahnā hai

ai paik-e-ajal tere hāthoñ āzād-e-ta.alluq ruuh huī
tā-hashr badal saktā hī nahīñ ham ne vo libās ab pahnā hai

ai girya-e-ḳhūñ tāsīr dikhā ai josh-e-fuġhāñ kuchh himmat kar
rañgīñ ho kisī kā dāman bhī ashkoñ kā yahāñ tak bahnā hai

apnā hī savāl ai 'dil' hai javāb is bazm meñ āḳhir kyā kahiye
kahnā hai vahī jo sunñā hai sunñā hai vahī jo kahnā hai

mayus-e-azal hun ye mana nakaam-e-tamanna rahna hai
jate ho kahan ruKH pher ke tum mujh ko to abhi kuchh kahna hai

khinchenge wahan phir sard aahen aankhon se lahu phir bahna hai
afsana kaha tha jo hum ne dohra ke wahin tak kahna hai

dushwar bahut ye manzil thi mar miT ke tah-e-turbat pahunche
har qaid se hum aazad hue duniya se alag ab rahna hai

rakhta hai qadam is kucha mein zarre hain qayamat-za jis ke
anjam-e-wafa hai nazron mein aaghaz hi se dukh sahna hai

ai paik-e-ajal tere hathon aazad-e-talluq ruh hui
ta-hashr badal sakta hi nahin hum ne wo libas ab pahna hai

ai girya-e-KHun tasir dikha ai josh-e-fughan kuchh himmat kar
rangin ho kisi ka daman bhi ashkon ka yahan tak bahna hai

apna hi sawal ai 'dil' hai jawab is bazm mein aaKHir kya kahiye
kahna hai wahi jo sunna hai sunna hai wahi jo kahna hai


Leave a comment

+