Subscribe to our newsletter and get our newest updates

Wajd Chughtai

  • Ghazal


raat qatil ki gali ho jaise


raat qātil kī galī ho jaise
chāñd iisā sā banī ho jaise

raat ik shab kī byāhī ho dulhan
maañg tāroñ se bharī ho jaise

un hī zarroñ se haiñ lamhe mah-o-sāl
umr ik ret-ghaḌī ho jaise

ek tinkā bhī na chhoḌā ghar meñ
tez āñdhī sī chalī ho jaise

yuuñ umañDtā hai tirā ġham ab tak
koī sāvan kī nadī ho jaise

jis ne patthar kā kiyā hai mujh ko
alf-lailā kī parī ho jaise

jaane kaise haiñ rafīqoñ ke makāñ
koī dushman kī galī ho jaise

us meñ ġham ke na ḳhushī ke aañsū
aañkh patthar kī banī ho jaise

is tarah ḳhush huuñ ki ḳhvāboñ meñ vahī
phuul barsā ke ga.ī ho jaise

maiñ use bhuul gayā huuñ aise
vo mujhe bhuul ga.ī ho jaise

aaj ke daur meñ ye mashq-e-suḳhan
muft kī dard-sarī ho jaise

raat qatil ki gali ho jaise
chand isa sa bani ho jaise

raat ek shab ki byahi ho dulhan
mang taron se bhari ho jaise

un hi zarron se hain lamhe mah-o-sal
umr ek ret-ghaDi ho jaise

ek tinka bhi na chhoDa ghar mein
tez aandhi si chali ho jaise

yun umanDta hai tera gham ab tak
koi sawan ki nadi ho jaise

jis ne patthar ka kiya hai mujh ko
alf-laila ki pari ho jaise

jaane kaise hain rafiqon ke makan
koi dushman ki gali ho jaise

us mein gham ke na KHushi ke aansu
aankh patthar ki bani ho jaise

is tarah KHush hun ki KHwabon mein wahi
phul barsa ke gai ho jaise

main use bhul gaya hun aise
wo mujhe bhul gai ho jaise

aaj ke daur mein ye mashq-e-suKHan
muft ki dard-sari ho jaise


Leave a comment

+