miTTī thā maiñ ḳhamīr tire naaz se uThā
phir haft-āsmāñ mirī parvāz se uThā

insān ho kisī bhī sadī kā kahīñ kā ho
ye jab uThā zamīr kī āvāz se uThā

sub.h-e-chaman meñ ek yahī āftāb thā
is aadmī kī laash ko e.azāz se uThā

sau kartaboñ se likhkhā gayā ek ek lafz
lekin ye jab uThā kisī e.ajāz se uThā

ai shahsavār-e-husn ye dil hai ye merā dil
ye terī sar-zamīñ hai qadam naaz se uThā

maiñ pūchh luuñ ki kyā hai mirā jabr o iḳhtiyār
yā-rab ye mas.ala kabhī āġhāz se uThā

vo abr shabnamī thā ki nahlā gayā vajūd
maiñ ḳhvāb dekhtā huā alfāz se uThā

shā.er kī aañkh kā vo sitāra huā 'alīm'
qāmat meñ jo qayāmatī andāz se uThā

miTTi tha main KHamir tere naz se uTha
phir haft-asman meri parwaz se uTha

insan ho kisi bhi sadi ka kahin ka ho
ye jab uTha zamir ki aawaz se uTha

subh-e-chaman mein ek yahi aaftab tha
is aadmi ki lash ko eazaz se uTha

sau kartabon se likhkha gaya ek ek lafz
lekin ye jab uTha kisi eajaz se uTha

ai shahsawar-e-husn ye dil hai ye mera dil
ye teri sar-zamin hai qadam naz se uTha

main puchh lun ki kya hai mera jabr o iKHtiyar
ya-rab ye masala kabhi aaghaz se uTha

wo abr shabnami tha ki nahla gaya wajud
main KHwab dekhta hua alfaz se uTha

shaer ki aankh ka wo sitara hua 'alim'
qamat mein jo qayamati andaz se uTha

Videos
This video is playing from YouTube Videos
This video is playing from YouTube Obaidullah Aleem

Source: Vahshat Hi Sahi