Subscribe to our newsletter and get our newest updates

Diya Jeem

  • Ghazal

zaban pe aane se pahle kahi gai hun main


zabāñ pe aane se pahle kahī ga.ī huuñ maiñ
kisī ḳhayāl meñ kho kar bunī ga.ī huuñ maiñ

mire ḳhayāl kī dahlīz itnī ūñchī hai
ki āsmāñ ke barābar chunī ga.ī huuñ maiñ

mirā ġhurūr mirī vahshatoñ pe haavī hai
kuchh aise vasf se mumtāz kī ga.ī huuñ maiñ

mire vajūd meñ pahroñ sukūt rahtā hai
na jaane kis kī sadā meñ guñdhī ga.ī huuñ maiñ

mire ḳhayāl se jal jaate haiñ charāġh-e-sahar
ki tāq-e-shams-o-qamar par rakhī ga.ī huuñ maiñ

vo roz ḳhvāb ke rauzan se dekhtā hai mujhe
ajiib Dor hai jis se bañdhī ga.ī huuñ maiñ

sabhī ke dil meñ 'diyā' pyaar kā jalātī huuñ
varaq varaq pe ujālā likhī ga.ī huuñ maiñ

zaban pe aane se pahle kahi gai hun main
kisi KHayal mein kho kar buni gai hun main

mere KHayal ki dahliz itni unchi hai
ki aasman ke barabar chuni gai hun main

mera ghurur meri wahshaton pe hawi hai
kuchh aise wasf se mumtaz ki gai hun main

mere wajud mein pahron sukut rahta hai
na jaane kis ki sada mein gundhi gai hun main

mere KHayal se jal jate hain charagh-e-sahar
ki taq-e-shams-o-qamar par rakhi gai hun main

wo roz KHwab ke rauzan se dekhta hai mujhe
ajib Dor hai jis se bandhi gai hun main

sabhi ke dil mein 'diya' pyar ka jalati hun
waraq waraq pe ujala likhi gai hun main


Leave a comment

+