maiñ pī rahī huuñ ki zahrāb haiñ mire aañsū
tirī nazar meñ faqat aab haiñ mire aañsū

tū āftāb hai merā maiñ tujh se huuñ raushan
tire huzūr to mahtāb haiñ mire aañsū

vo ġhāliban unheñ hāthoñ meñ thaam bhī letā
use ḳhabar na thī sailāb haiñ mire aañsū

ḳhayāl rakhte haiñ tanhā.iyoñ kā mahfil kā
ye kitne vāqif-e-ādāb haiñ mire aañsū

chhupā ke rakhtī huuñ har ġham ko laakh pardoñ meñ
fasīl-e-zabt se nāyāb haiñ mire aañsū

sahīfa jaan ke āñkhoñ ko paḌh rahā hai koī
ye rasm-e-ijrā ko betāb haiñ mire aañsū

maiñ shā.erī ke huuñ fann-e-arūz se vāqif
zabar haiñ zer haiñ eraab haiñ mire aañsū

jise paḌhā nahīñ tum ne kabhī mohabbat se
kitāb-e-zīst kā vo baab haiñ mire aañsū

'hayā' ke raaz ko āñkhoñ meñ DhūñDne vaalo
shanāvaro suno girdāb haiñ mire aañsū

main pi rahi hun ki zahrab hain mere aansu
teri nazar mein faqat aab hain mere aansu

tu aaftab hai mera main tujh se hun raushan
tere huzur to mahtab hain mere aansu

wo ghaaliban unhen hathon mein tham bhi leta
use KHabar na thi sailab hain mere aansu

KHayal rakhte hain tanhaiyon ka mahfil ka
ye kitne waqif-e-adab hain mere aansu

chhupa ke rakhti hun har gham ko lakh pardon mein
fasil-e-zabt se nayab hain mere aansu

sahifa jaan ke aankhon ko paDh raha hai koi
ye rasm-e-ijra ko betab hain mere aansu

main shaeri ke hun fann-e-aruz se waqif
zabar hain zer hain erab hain mere aansu

jise paDha nahin tum ne kabhi mohabbat se
kitab-e-zist ka wo bab hain mere aansu

'haya' ke raaz ko aankhon mein DhunDne walo
shanawaro suno girdab hain mere aansu