Subscribe to our newsletter and get our newest updates

Zain-ul-Abideen Khan Arif

  • Ghazal


na parda kholiyo ai ishq gham mein tu mera


na parda kholiyo ai ishq ġham meñ tū merā
kahīñ na sāmne un ke ho zard rū merā

tum apnī zulf se pūchho mirī pareshānī
ki haal us ko hai ma.alūm hū-ba-hū merā

agarche laakh rafū-gar ne dil kiyā behtar
ye jab bhī ho na sakā zaḳhm-e-dil rafū merā

faqat vo is liye aate haiñ jānib-e-zindāñ
ki phañs ke ghuTne lage tauq meñ gulū merā

nishāna tīr-e-nigah kā ba-dil karūñ 'ārif'
laḌā.e aañkh agar mujh se jañg-jū merā

na parda kholiyo ai ishq gham mein tu mera
kahin na samne un ke ho zard ru mera

tum apni zulf se puchho meri pareshani
ki haal us ko hai malum hu-ba-hu mera

agarche lakh rafu-gar ne dil kiya behtar
ye jab bhi ho na saka zaKHm-e-dil rafu mera

faqat wo is liye aate hain jaanib-e-zindan
ki phans ke ghuTne lage tauq mein gulu mera

nishana tir-e-nigah ka ba-dil karun 'arif'
laDae aankh agar mujh se jang-ju mera


Source:

Leave a comment

+