Subscribe to our newsletter and get our newest updates

Yusuf Zafar

  • Ghazal


jis ka badan hai KHushbu jaisa jis ki chaal saba si hai


jis kā badan hai ḳhushbū jaisā jis kī chaal sabā sī hai
us ko dhyān meñ lā.ūñ kaise vo sapnoñ kā baasī hai

phūloñ ke gajre toḌ ga.ī ākāsh pe shaam salonī shaam
vo raajā ḳhud kaise hoñge jin kī ye chanchal daasī hai

kaalī badriyā siip siip to buuñd buuñd se bhar jā.egā
dekh ye bhūrī miTTī to bas mere ḳhuun kī pyāsī hai

jañgal mele aur shahroñ meñ dharā hī kyā hai mere liye
jag jag jis ne saath diyā hai vo to merī udāsī hai

lauT ke us ne phir nahīñ dekhā jis ke liye ham jiite haiñ
dil kā bujhānā ik andher hai yuuñ to baat zarā sī hai

chāñd-nagar se aane vaalī miTTī kañkar rol ke laa.e
dhartī-māñ chup hai jaise kuchh soch rahī ho ḳhafā sī hai

har raat us kī bāteñ sun kar tujh ko niiñd aatī hai 'zafar'
har raat usī kī bāteñ chheḌeñ ye to ajab biptā sī hai

jis ka badan hai KHushbu jaisa jis ki chaal saba si hai
us ko dhyan mein laun kaise wo sapnon ka basi hai

phulon ke gajre toD gai aakash pe sham saloni sham
wo raja KHud kaise honge jin ki ye chanchal dasi hai

kali badriya sip sip to bund bund se bhar jaega
dekh ye bhuri miTTi to bas mere KHun ki pyasi hai

jangal mele aur shahron mein dhara hi kya hai mere liye
jag jag jis ne sath diya hai wo to meri udasi hai

lauT ke us ne phir nahin dekha jis ke liye hum jite hain
dil ka bujhana ek andher hai yun to baat zara si hai

chand-nagar se aane wali miTTi kankar rol ke lae
dharti-man chup hai jaise kuchh soch rahi ho KHafa si hai

har raat us ki baaten sun kar tujh ko nind aati hai 'zafar'
har raat usi ki baaten chheDen ye to ajab bipta si hai


Leave a comment

+