dūdmān-e-dard kī shādī haiñ ham
ḳhāndān-e-ġham kī ābādī haiñ ham

apnī shūmī se huī shādī ġhamī
shāyad ābādī kī barbādī haiñ ham

apne āb-e-chashm se sarsabz haiñ
zeb-e-dasht-o-zīnat-e-vādī haiñ ham

darmiyān-e-zindagī-o-marg haiñ
qābil-e-said o na sayyādī haiñ ham

zaḳhm-hā-e-hijr meñ kyā kyā sahe
kushtagān-e-teġh-e-faulādī haiñ ham

banda-e-pīrem yā-rab az azaab
mūrid-e-altāf-e-āzādī haiñ ham

ham nahīñ kahte muqallid haiñ tire
tere dar ke kalb-e-qillādī haiñ ham

daad kar ai dād-gar ushshāq-kush
tere aage tujh se fariyādī haiñ ham

ḳhūñ-bahā ma.ashūq se lete nahīñ
āshiq-e-insāf-e-be-dādī haiñ ham

duḳhtar-e-raz ko koī ham se kahe
tere to haqdār dāmādī haiñ ham

ham gunahgār-e-janāb-e-ishq haiñ
abd-e-ubbādī na aurādī haiñ ham

ai azīzāñ tark-e-ishq-e-husn meñ
sañg par juuñ naqsh-e-bahzādī haiñ ham

lā-valad kahte haiñ ham ko lā-valad
sher se az-bas-ki aulādī haiñ ham

āqibat ḳhākī haiñ ḳhākī hoñge ne
ātishī-o-āhī-o-bādī haiñ ham

fat.h-bāġhī ne nasar-pūrī haiñ balki
sindh meñ bhī haidrābādī haiñ ham

kyā kaheñ kyā the kahāñ se aa.e haiñ
misl-e-mazmūn-e-nau īrādī haiñ ham

phir bhī vo īrād karne saktā hai
jis ke avval baar ījādī haiñ ham

mast-e-ahmad se 'mātam' haiñ shakar*
ne sumūdī qaum ne aadī haiñ ham

dudman-e-dard ki shadi hain hum
KHandan-e-gham ki aabaadi hain hum

apni shumi se hui shadi ghami
shayad aabaadi ki barbaadi hain hum

apne aab-e-chashm se sarsabz hain
zeb-e-dasht-o-zinat-e-wadi hain hum

darmiyan-e-zindagi-o-marg hain
qabil-e-said o na sayyaadi hain hum

zaKHm-ha-e-hijr mein kya kya sahe
kushtagan-e-tegh-e-fauladi hain hum

banda-e-pirem ya-rab az azab
murid-e-altaf-e-azadi hain hum

hum nahin kahte muqallid hain tere
tere dar ke kalb-e-qilladi hain hum

dad kar ai dad-gar ushshaq-kush
tere aage tujh se fariyaadi hain hum

KHun-baha mashuq se lete nahin
aashiq-e-insaf-e-be-dadi hain hum

duKHtar-e-raz ko koi hum se kahe
tere to haqdar damadi hain hum

hum gunahgar-e-janab-e-ishq hain
abd-e-ubbaadi na auradi hain hum

ai azizan tark-e-ishq-e-husn mein
sang par jun naqsh-e-bahzadi hain hum

la-walad kahte hain hum ko la-walad
sher se az-bas-ki auladi hain hum

aaqibat KHaki hain KHaki honge ne
aatishi-o-ahi-o-baadi hain hum

fath-baghi ne nasar-puri hain balki
sindh mein bhi haidrabaadi hain hum

kya kahen kya the kahan se aae hain
misl-e-mazmun-e-nau iradi hain hum

phir bhi wo irad karne sakta hai
jis ke awwal bar ijadi hain hum

mast-e-ahmad se 'matam' hain shakar*
ne sumudi qaum ne aadi hain hum