Subscribe to our newsletter and get our newest updates

Faiz rahil Khan

  • Ghazal


nind aa jae to lamhat mein mar jate hain


niiñd aa jaa.e to lamhāt meñ mar jaate haiñ
din se bach nikle badan raat meñ mar jaate haiñ

karte haiñ apnī zabāñ se jo diloñ ko zaḳhmī
dab ke ik din vo isī baat meñ mar jaate haiñ

yaad aatī hai terī jab bhī gulābī bāteñ
Duub kar tere ḳhayālāt meñ mar jaatā huuñ

jab kabhī jaate haiñ ahbāb kī shādī meñ ham
jāneñ kyuuñ jaate hī sadmāt meñ mar jaate haiñ

laḌne kī taab to miTTī ke makānoñ meñ hai
kāñch-ghar mausam-e-barsāt meñ mar jaate haiñ

tab koī Duub ke paanī meñ fanā hotā hai
ḳhvāb jab talḳhī-e-hālāt meñ mar jaate haiñ

jab havā baaġh se kahtī hai ḳhizāñ aa.ī hai
bāġhbāñ phuul liye haat meñ mar jaate haiñ

nind aa jae to lamhat mein mar jate hain
din se bach nikle badan raat mein mar jate hain

karte hain apni zaban se jo dilon ko zaKHmi
dab ke ek din wo isi baat mein mar jate hain

yaad aati hai teri jab bhi gulabi baaten
Dub kar tere KHayalat mein mar jata hun

jab kabhi jate hain ahbab ki shadi mein hum
jaanen kyun jate hi sadmat mein mar jate hain

laDne ki tab to miTTi ke makanon mein hai
kanch-ghar mausam-e-barsat mein mar jate hain

tab koi Dub ke pani mein fana hota hai
KHwab jab talKHi-e-haalat mein mar jate hain

jab hawa bagh se kahti hai KHizan aai hai
baghban phul liye hat mein mar jate hain


Leave a comment

+