Subscribe to our newsletter and get our newest updates

Ghulam Husain Sajid

  • Ghazal


koi jab chhin leta hai mata-e-sabr miTTi se


koī jab chhīn letā hai matā-e-sabr miTTī se
to apne aap ug aatī hai us kī qabr miTTī se

sajā rakhā thā ma.abad ke kisī tārīk goshe meñ
banā kar ek dast-e-mehrbāñ ne abr miTTī se

kahāñ jī shaad rahtā hai faqat kār-e-mohabbat meñ
ki virse meñ milā hai aadmī ko jabr miTTī se

maiñ is kuuze ke paanī se koī shamshīr Dhālūñgā
aur us ko ā.īne se aab dūñgā sabr miTTī se

vo kis duniyā se aa.e haiñ vo kis duniyā ke baasī haiñ
banāte haiñ jo gahre pāniyoñ meñ qabr miTTī se

isī duniyā meñ baste haiñ ajab kuchh log aise bhī
jo pal meñ khīñch sakte haiñ ridā-e-jabr miTTī se

maiñ agle jashn meñ chūmūñgā un be-dāġh hāthoñ ko
ki jin hāthoñ ne Dhālā hai charāġh-e-abr miTTī se

koi jab chhin leta hai mata-e-sabr miTTi se
to apne aap ug aati hai us ki qabr miTTi se

saja rakha tha mabad ke kisi tarik goshe mein
bana kar ek dast-e-mehrban ne abr miTTi se

kahan ji shad rahta hai faqat kar-e-mohabbat mein
ki wirse mein mila hai aadmi ko jabr miTTi se

main is kuze ke pani se koi shamshir Dhaalunga
aur us ko aaine se aab dunga sabr miTTi se

wo kis duniya se aae hain wo kis duniya ke basi hain
banate hain jo gahre paniyon mein qabr miTTi se

isi duniya mein baste hain ajab kuchh log aise bhi
jo pal mein khinch sakte hain rida-e-jabr miTTi se

main agle jashn mein chumunga un be-dagh hathon ko
ki jin hathon ne Dhaala hai charagh-e-abr miTTi se


Leave a comment

+