Subscribe to our newsletter and get our newest updates

Dagh Dehlvi

  • Ghazal


aarzu hai wafa kare koi


aarzū hai vafā kare koī
jī na chāhe to kyā kare koī

gar maraz ho davā kare koī
marne vaale kā kyā kare koī

koste haiñ jale hue kyā kyā
apne haq meñ duā kare koī

un se sab apnī apnī kahte haiñ
merā matlab adā kare koī

chaah se aap ko to nafrat hai
mujh ko chāhe ḳhudā kare koī

us gile ko gila nahīñ kahte
gar maze kā gilā kare koī

ye milī daad rañj-e-furqat kī
aur dil kā kahā kare koī

tum sarāpā ho sūrat-e-tasvīr
tum se phir baat kyā kare koī

kahte haiñ ham nahīñ ḳhudā-e-karīm
kyuuñ hamārī ḳhatā kare koī

jis meñ lākhoñ baras kī hūreñ hoñ
aisī jannat ko kyā kare koī

is jafā par tumheñ tamannā hai
ki mirī iltijā kare koī

muñh lagāte hī 'dāġh' itrāyā
lutf hai phir jafā kare koī

aarzu hai wafa kare koi
ji na chahe to kya kare koi

gar maraz ho dawa kare koi
marne wale ka kya kare koi

koste hain jale hue kya kya
apne haq mein dua kare koi

un se sab apni apni kahte hain
mera matlab ada kare koi

chah se aap ko to nafrat hai
mujh ko chahe KHuda kare koi

us gile ko gila nahin kahte
gar maze ka gila kare koi

ye mili dad ranj-e-furqat ki
aur dil ka kaha kare koi

tum sarapa ho surat-e-taswir
tum se phir baat kya kare koi

kahte hain hum nahin KHuda-e-karim
kyun hamari KHata kare koi

jis mein lakhon baras ki huren hon
aisi jannat ko kya kare koi

is jafa par tumhein tamanna hai
ki meri iltija kare koi

munh lagate hi 'dagh' itraya
lutf hai phir jafa kare koi

Videos
This video is playing from YouTube Videos
This video is playing from YouTube Unknown

Source: Book : Lamhon Ki Aawaz (Pg. 224) Author : Owais Ahmad Dauran Publication : label litho press Ramna Road Patna-4 (1974) Edition : 1974

Leave a comment

+