dilbar kahā rafīq kahā chāragar kahā
jo kuchh bhī tum ko ham ne kahā soch kar kahā

vo tum ki ham ko aaj bhī muḳhlis na kah sake
aur ham ne saarī umr tumheñ mo'atabar kahā

ye raunaqeñ jahān kī mansūb tum se kiiñ
phir un tajalliyoñ ko harīm-e-nazar kahā

pursish tirī fareb tasallī tirī fareb
vo dil kī baat thī jise duniyā kā Dar kahā

tere nuqūsh-e-pā ko batāyā hai kahkashāñ
terī galī ke zarroñ ko shams-o-qamar kahā

sab mutma.in the dekh ke āzādiyāñ mirī
mere zamīr ne mujhe be-bāl-o-par kahā

un par to koī harf na aane diyā 'ziyā'
jo guzrī us ko gardish-e-shām-o-sahar kahā

dilbar kaha rafiq kaha chaaragar kaha
jo kuchh bhi tum ko hum ne kaha soch kar kaha

wo tum ki hum ko aaj bhi muKHlis na kah sake
aur hum ne sari umr tumhein mo'atabar kaha

ye raunaqen jahan ki mansub tum se kin
phir un tajalliyon ko harim-e-nazar kaha

pursish teri fareb tasalli teri fareb
wo dil ki baat thi jise duniya ka Dar kaha

tere nuqush-e-pa ko bataya hai kahkashan
teri gali ke zarron ko shams-o-qamar kaha

sab mutmain the dekh ke aazadiyan meri
mere zamir ne mujhe be-baal-o-par kaha

un par to koi harf na aane diya 'ziya'
jo guzri us ko gardish-e-sham-o-sahar kaha