Subscribe to our newsletter and get our newest updates

Karamat Ali Karamat

  • Ghazal


kahte hain log ye ki baDi dil-nashin hai sham


kahte haiñ log ye ki baḌī dil-nashīñ hai shaam
lekin mujhe ye lagtā hai andoh-gīñ hai shaam

ye ik chhalāvā hai ki pahāḌoñ kī aag hai
vahm-o-gumāñ kī shakl meñ jaise yaqīñ hai shaam

kyā us ko DhūñDte ho ḳhalāoñ ke darmiyāñ
tum apne dil meñ khoj ke dekho yahīñ hai shaam

ye kaisī machhliyāñ haiñ chamaktī haiñ raat bhar
ye jhiil hai ki ek nigāh-e-hasīñ hai shaam

donoñ kā vasl ho to shafaq-rañg ho ye dil
hai raat āsmān to goyā zamīñ hai shaam

din kā gunāh raat ke sar aa gayā hai kyūñ?
kyā shab kī be-gunāhī kī shāhid nahīñ hai shām?

ye to badal chukī hai 'karāmat' havā kā ruḳh
kaise kahūñ ki vaqt ke zer-e-nagīñ hai shaam

kahte hain log ye ki baDi dil-nashin hai sham
lekin mujhe ye lagta hai andoh-gin hai sham

ye ek chhalawa hai ki pahaDon ki aag hai
wahm-o-guman ki shakl mein jaise yaqin hai sham

kya us ko DhunDte ho KHalaon ke darmiyan
tum apne dil mein khoj ke dekho yahin hai sham

ye kaisi machhliyan hain chamakti hain raat bhar
ye jhil hai ki ek nigah-e-hasin hai sham

donon ka wasl ho to shafaq-rang ho ye dil
hai raat aasman to goya zamin hai sham

din ka gunah raat ke sar aa gaya hai kyun?
kya shab ki be-gunahi ki shahid nahin hai sham?

ye to badal chuki hai 'karamat' hawa ka ruKH
kaise kahun ki waqt ke zer-e-nagin hai sham


Source: Book : Handwriting File Mail By Salim Saleem

Leave a comment

+