Subscribe to our newsletter and get our newest updates

Zafar Zaidi

  • Ghazal


qadam qadam pe ajab KHauf sa guzarta hai


qadam qadam pe ajab ḳhauf sā guzartā hai
vo apne gaañv meñ jaate hue bhī Dartā hai

havā.eñ chalne lagī haiñ chahār-jānib se
sambhālnā ki har ik silsila bikhartā hai

kabhī jhiñjhoḌ ke rakh detā hai tamām badan
kabhī vo dil meñ dabe paañv bhī utartā hai

bajā.e us ke ki mujh ko bhī jagmagā detā
vo chāñd ho ke mirī tīrgī se Dartā hai

utar rahā huuñ maiñ tanhā.iyoñ ke dariyā meñ
ye dekhnā hai pas-e-āb kyā ubhartā hai

ye dhuup jism jalā degī Thiik hai lekin
yahāñ pe kaun bhalā apnī maut martā hai

qadam qadam pe ajab KHauf sa guzarta hai
wo apne ganw mein jate hue bhi Darta hai

hawaen chalne lagi hain chahaar-jaanib se
sambhaalna ki har ek silsila bikharta hai

kabhi jhinjhoD ke rakh deta hai tamam badan
kabhi wo dil mein dabe panw bhi utarta hai

bajae us ke ki mujh ko bhi jagmaga deta
wo chand ho ke meri tirgi se Darta hai

utar raha hun main tanhaiyon ke dariya mein
ye dekhna hai pas-e-ab kya ubharta hai

ye dhup jism jala degi Thik hai lekin
yahan pe kaun bhala apni maut marta hai


Source: Rooh-e-Ghazal,Pachas Sala Intekhab

Leave a comment

+