aa.e kyā kyā yaad nazar jab paḌtī in dālānoñ par
us kā kāġhaz chipkā denā ghar ke raushan-dānoñ par

aaj bhī jaise shāne par tum haath mire rakh detī ho
chalte chalte ruk jaatā huuñ saarī kī dūkānoñ par

barkhā kī to baat hī chhoḌo chanchal hai purvā.ī bhī
jaane kis kā sabz dupaTTā pheñk ga.ī hai dhānoñ par

shahr ke tapte fuTpāthoñ par gaañv ke mausam saath chaleñ
būḌhe bargad haath sā rakh deñ mere jalte shānoñ par

saste dāmoñ le to aate lekin dil thā bhar aayā
jaane kis kā naam khudā thā pītal ke gul-dānoñ par

us kā kyā man-bhed batā.ūñ us kā kyā andāz kahūñ
baat bhī merī sunñā chāhe haath bhī rakkhe kānoñ par

aur bhī siina kasne lagtā aur kamar bal khā jaatī
jab bhī us ke paañv phisalne lagte the Dhalvānoñ par

sher to un par likkhe lekin auroñ se mansūb kiye
un ko kyā kyā ġhussa aayā nazmoñ ke unvānoñ par

yaaro apne ishq ke qisse yuuñ bhī kam mash.hūr nahīñ
kal to shāyad novel likkhe jaa.eñ in rūmānoñ par

aae kya kya yaad nazar jab paDti in dalanon par
us ka kaghaz chipka dena ghar ke raushan-danon par

aaj bhi jaise shane par tum hath mere rakh deti ho
chalte chalte ruk jata hun sari ki dukanon par

barkha ki to baat hi chhoDo chanchal hai purwai bhi
jaane kis ka sabz dupaTTa phenk gai hai dhanon par

shahr ke tapte fuTpathon par ganw ke mausam sath chalen
buDhe bargad hath sa rakh den mere jalte shanon par

saste damon le to aate lekin dil tha bhar aaya
jaane kis ka nam khuda tha pital ke gul-danon par

us ka kya man-bhed bataun us ka kya andaz kahun
baat bhi meri sunna chahe hath bhi rakkhe kanon par

aur bhi sina kasne lagta aur kamar bal kha jati
jab bhi us ke panw phisalne lagte the Dhalwanon par

sher to un par likkhe lekin auron se mansub kiye
un ko kya kya ghussa aaya nazmon ke unwanon par

yaro apne ishq ke qisse yun bhi kam mashhur nahin
kal to shayad nowel likkhe jaen in rumanon par

Source: Book : Kulliyat-e-gopal mittal (Pg. 191) Author : Gopal Mittal Publication : Modern Publishing House, Daryaganj New delhi (1994) Edition : 1994