Subscribe to our newsletter and get our newest updates

Om Parkash Bajaj

  • Ghazal


sehn-e-gulshan mein chandni dekhen


sehn-e-gulshan meñ chāñdnī dekheñ
husn-e-takmīl-e-zindagī dekheñ

aao fitrat kī dekheñ ra.anā.ī
pattiyāñ kuchh harī harī dekheñ

merā har sher hai nishān-e-hayāt
merā andāz-e-shā.irī dekheñ

sirf tere hī ham pujārī haiñ
dil meñ terī hī mūrtī dekheñ

chashm-e-bātin khule to baat bane
arsh ke raaz har ghaḌī dekheñ

merī nazroñ meñ ek sā hai samāñ
kamtarī aur na bartarī dekheñ

mast-o-be-ḳhud sā hai 'bajāj' koī
us kā andāz-e-zindagī dekheñ

sehn-e-gulshan mein chandni dekhen
husn-e-takmil-e-zindagi dekhen

aao fitrat ki dekhen ranai
pattiyan kuchh hari hari dekhen

mera har sher hai nishan-e-hayat
mera andaz-e-shairi dekhen

sirf tere hi hum pujari hain
dil mein teri hi murti dekhen

chashm-e-baatin khule to baat bane
arsh ke raaz har ghaDi dekhen

meri nazron mein ek sa hai saman
kamtari aur na bartari dekhen

mast-o-be-KHud sa hai 'bajaj' koi
us ka andaz-e-zindagi dekhen


Leave a comment

+