Subscribe to our newsletter and get our newest updates

Ejaz Rahmani

  • Ghazal


sae mein aablon ki jalan aur baDh gai


saa.e meñ ābloñ kī jalan aur baḌh ga.ī
thak kar jo baiThe ham to thakan aur baḌh ga.ī

kal is qadar thā habs hamāre makān meñ
sankī havā zarā to ghuTan aur baḌh ga.ī

kāñToñ kī guftugū se ḳhalish dil meñ kam na thī
phūloñ ke tazkire se chubhan aur baḌh ga.ī

ye bāġhbāñ hamāre lahū kā kamāl hai
nairañgī-e-bahār-e-chaman aur baḌh ga.ī

ye hijr kī hai aag mizāj us kā aur hai
ashkoñ se sho.alagī-e-badan aur baḌh ga.ī

sairāb kar sakā na use merā ḳhuun bhī
kuchh tishnagī-e-dār-o-rasan aur baḌh ga.ī

harf-e-sipās pesh kiyā jab bhī vo milā
lekin jabīñ pe us kī shikan aur baḌh ga.ī

tahrīr kī jo ek ġhazal us ke naam par
'ejāz' ābrū-e-suḳhan aur baḌh ga.ī

sae mein aablon ki jalan aur baDh gai
thak kar jo baiThe hum to thakan aur baDh gai

kal is qadar tha habs hamare makan mein
sanki hawa zara to ghuTan aur baDh gai

kanTon ki guftugu se KHalish dil mein kam na thi
phulon ke tazkire se chubhan aur baDh gai

ye baghban hamare lahu ka kamal hai
nairangi-e-bahaar-e-chaman aur baDh gai

ye hijr ki hai aag mizaj us ka aur hai
ashkon se shoalagi-e-badan aur baDh gai

sairab kar saka na use mera KHun bhi
kuchh tishnagi-e-dar-o-rasan aur baDh gai

harf-e-sipas pesh kiya jab bhi wo mila
lekin jabin pe us ki shikan aur baDh gai

tahrir ki jo ek ghazal us ke nam par
'ejaz' aabru-e-suKHan aur baDh gai


Leave a comment

+