Subscribe to our newsletter and get our newest updates

Imdad Ali Bahr

  • Ghazal


KHurshid firaq mein tapan hai


ḳhurshīd firāq meñ tapāñ hai
ai zarra-navāz tū kahāñ hai

kyuuñ rote haiñ dekh dekh kar ham
ye zulf-e-siyah hai yā dhuāñ hai

muñh dekh rahā huuñ aur chup huuñ
kyā baat karūñ vo bad-zabāñ hai

ab minnat-e-bāġhbāñ abas hai
patjhaḌ ke din aa ga.e ḳhizāñ hai

gulzār nahīñ maqām-e-ishrat
bulbul pe jafā-e-bāġhbāñ hai

gul ko bhī hī kuchh ġham-e-nihāñ ne
ġhunche kī chaTak nahīñ fuġhāñ hai

gardūñ ne hī sab ko maar rakkhā
jo zinda bhī hai vo nīm-jāñ hai

ye kāhkashāñ nahīñ saroñ par
khīñche hue teġh āsmāñ hai

kyā qais se multafit ho lailā
nañgā hai vo nañg-e-ḳhāndāñ hai

parvāne se sham.a kyā chhupegī
maiñ bhī pūchhūñgā tū jahāñ hai

dekhā ai 'bahr' terā dīvān
ik daftar-e-hāl-e-āshiqāñ hai

KHurshid firaq mein tapan hai
ai zarra-nawaz tu kahan hai

kyun rote hain dekh dekh kar hum
ye zulf-e-siyah hai ya dhuan hai

munh dekh raha hun aur chup hun
kya baat karun wo bad-zaban hai

ab minnat-e-baghban abas hai
patjhaD ke din aa gae KHizan hai

gulzar nahin maqam-e-ishrat
bulbul pe jafa-e-baghban hai

gul ko bhi hi kuchh gham-e-nihan ne
ghunche ki chaTak nahin fughan hai

gardun ne hi sab ko mar rakkha
jo zinda bhi hai wo nim-jaan hai

ye kahkashan nahin saron par
khinche hue tegh aasman hai

kya qais se multafit ho laila
nanga hai wo nang-e-KHandan hai

parwane se shama kya chhupegi
main bhi puchhunga tu jahan hai

dekha ai 'bahr' tera diwan
ek daftar-e-haal-e-ashiqan hai


Source: Book : Safeer-e-shar-e-dil (Pg. 62) Author : Hafeez Banarsi Publication : Hafeez Banarsi (2007) Edition : 2007

Leave a comment

+