Subscribe to our newsletter and get our newest updates

Kashfi Lucknavi

  • Ghazal


gham se ghabra ke qayamat ka talabgar na ban


ġham se ghabrā ke qayāmat kā talabgār na ban
itnā māyūs-e-karam ai dil-e-bīmār na ban

ḳhvāhish-e-dīd hai to tāb-e-nazar paidā kar
varna behtar hai yahī tālib-e-dīdār na ban

mujhe manzūr hai ye barq girā de mujh par
mujh se begāna magar ai nigah-e-yār na ban

dāman-e-hāl ko bhī phūloñ se bhar de nādāñ
sirf mustaqbil-e-rañgīñ kā taraf-dār na ban

bil-yaqīñ manzil-e-maqsūd milegī mujh ko
nā-umīdī tū mirī raah kī dīvār na bun

hai rihā.ī kī tamannā to girā de dīvār
qaid-e-zindāñ meñ rahīn-e-ġham-e-dīvār na ban

lā.eq-e-hamd hai vo jis kī ziyā hai un meñ
kam-nazar chāñd sitāroñ kā parastār na ban

maiñ ḳhatāvār huuñ to mujh ko miTā de sayyād
saare gulshan ke liye bā.is-e-āzār na ban

aise iqdām kā hāsil hai yahāñ nākāmī
bazm-e-sāqī hai ye 'kashfī' yahāñ ḳhuddār na ban

gham se ghabra ke qayamat ka talabgar na ban
itna mayus-e-karam ai dil-e-bimar na ban

KHwahish-e-did hai to tab-e-nazar paida kar
warna behtar hai yahi talib-e-didar na ban

mujhe manzur hai ye barq gira de mujh par
mujh se begana magar ai nigah-e-yar na ban

daman-e-haal ko bhi phulon se bhar de nadan
sirf mustaqbil-e-rangin ka taraf-dar na ban

bil-yaqin manzil-e-maqsud milegi mujh ko
na-umidi tu meri rah ki diwar na bun

hai rihai ki tamanna to gira de diwar
qaid-e-zindan mein rahin-e-gham-e-diwar na ban

laeq-e-hamd hai wo jis ki ziya hai un mein
kam-nazar chand sitaron ka parastar na ban

main KHatawar hun to mujh ko miTa de sayyaad
sare gulshan ke liye bais-e-azar na ban

aise iqdam ka hasil hai yahan nakaami
bazm-e-saqi hai ye 'kashfi' yahan KHuddar na ban


Source: Rooh-e-Ghazal,Pachas Sala Intekhab

Leave a comment

+