jaise ḳhushiyoñ meñ ġham nahīñ hote
aag paanī baham nahīñ hote
muddatoñ ham qarīb rahte haiñ
fāsle phir bhī kam nahīñ hote
zindagī bhar ke saath meñ aksar
ham-safar ham-qadam nahīñ hote
sānehe dil pe jo guzarte haiñ
sab ke sab to raqam nahīñ hote
puujā hotī hai zindagī bhar kī
chaar din ke sanam nahīñ hote
jo kabhī mujh pe dostoñ ke the
ab vo lutf-o-karam nahīñ hote
jaise KHushiyon mein gham nahin hote
aag pani baham nahin hote
muddaton hum qarib rahte hain
fasle phir bhi kam nahin hote
zindagi bhar ke sath mein aksar
ham-safar ham-qadam nahin hote
sanehe dil pe jo guzarte hain
sab ke sab to raqam nahin hote
puja hoti hai zindagi bhar ki
chaar din ke sanam nahin hote
jo kabhi mujh pe doston ke the
ab wo lutf-o-karam nahin hote
Leave a comment