justujū ke paañv ab ārām sā paane lage
ab hamāre paas bhī kuchh rāste aane lage

vaqt aur hālāt par kyā tabsira kiije ki jab
ek uljhan dūsrī uljhan ko suljhāne lage

shahr meñ jurm-o-havādis is qadar haiñ āj-kal
ab to ghar meñ baiTh kar bhī log ghabrāne lage

dil meñ aa baiThā hai dekho dūriyoñ kā devtā
ham jamā.at ke tasavvur se bhī uktāne lage

tum kisī mazlūm kī āvāz ban kar gūñjnā
yaad merī jab tumheñ shiddat se taḌpāne lage

le rahā hai dard añgḌā.ī uThā vo ehtijāj
zaḳhm-ḳhurda sab parinde pañkh phailāne lage

kaam aisā kyuuñ kiyā jaa.e ki jis ke ba.ad meñ
aadmī apne kiye par aap pachhtāne lage

justuju ke panw ab aaram sa pane lage
ab hamare pas bhi kuchh raste aane lage

waqt aur haalat par kya tabsira kije ki jab
ek uljhan dusri uljhan ko suljhane lage

shahr mein jurm-o-hawadis is qadar hain aaj-kal
ab to ghar mein baiTh kar bhi log ghabrane lage

dil mein aa baiTha hai dekho duriyon ka dewta
hum jamaat ke tasawwur se bhi uktane lage

tum kisi mazlum ki aawaz ban kar gunjna
yaad meri jab tumhein shiddat se taDpane lage

le raha hai dard angDai uTha wo ehtijaj
zaKHm-KHurda sab parinde pankh phailane lage

kaam aisa kyun kiya jae ki jis ke baad mein
aadmi apne kiye par aap pachhtane lage

Source: Book : Mujalla Dastavez (Pg. 115) Author : Aziz Nabeel Publication : Edarah Dastavez (2010) Edition : 2010