Subscribe to our newsletter and get our newest updates

Jafar Tahir

  • Ghazal


ye to nahin ki hum pe sitam hi kabhi na the


ye to nahīñ ki ham pe sitam hī kabhī na the
itnā zarūr thā ki vo nāguftanī na the

ai chashm-e-iltifāt ye kyā ho gayā tujhe
terī nazar meñ ham to kabhī ajnabī na the

phirte haiñ āftāb-zada kā.enāt meñ
ham par kisī kī zulf ke ehsāñ kabhī na the

pāmāl kar diyā jo falak ne to kyā kaheñ
ham to kisī kamāl ke bhī mudda.ī na the

kyā jurm thā ye aaj bhī ham par nahīñ khulā
ye ilm hai ki ahl-e-junūñ kushtanī na the

har lamha tere ishq meñ umr-e-abad banā
jo din bhī zindagī ke mile aarzī na the

murjhā ke bhī ga.ī na mahak jism-e-nāz kī
ye motiye ke phuul koī kāġhzī na the

yārān-e-shahr ishq meñ be-ābrū hue
ham par to mehrbāñ vo kabhī the kabhī na the

iqlīm-e-āshiqī ko diyā dīn-e-shā.irī
ham sāhib-e-kitāb the garche nabī na the

ham jin kī nazr karte javāhar kalām ke
'tāhir' hamāre shahar meñ vo jauharī na the

ye to nahin ki hum pe sitam hi kabhi na the
itna zarur tha ki wo naguftani na the

ai chashm-e-iltifat ye kya ho gaya tujhe
teri nazar mein hum to kabhi ajnabi na the

phirte hain aaftab-zada kaenat mein
hum par kisi ki zulf ke ehsan kabhi na the

pamal kar diya jo falak ne to kya kahen
hum to kisi kamal ke bhi muddai na the

kya jurm tha ye aaj bhi hum par nahin khula
ye ilm hai ki ahl-e-junun kushtani na the

har lamha tere ishq mein umr-e-abad bana
jo din bhi zindagi ke mile aarzi na the

murjha ke bhi gai na mahak jism-e-naz ki
ye motiye ke phul koi kaghzi na the

yaran-e-shahr ishq mein be-abru hue
hum par to mehrban wo kabhi the kabhi na the

iqlim-e-ashiqi ko diya din-e-shairi
hum sahib-e-kitab the garche nabi na the

hum jin ki nazr karte jawahar kalam ke
'tahir' hamare shahar mein wo jauhari na the


Leave a comment

+