maiñ būñdā-bāndī ke darmiyān apne ghar kī chhat par khaḌā rahā huuñ
charāġh thā koī jis ke ham-rāh rāt-bhar bhīgtā rahā huuñ

ye ab khulā hai ki un meñ mere nasīb kī dūriyāñ chhupī thiiñ
maiñ us ke hāthoñ kī jin lakīroñ ko muddatoñ chūmtā rahā huuñ

maiñ sun chukā huuñ havāoñ aur bādaloñ meñ jo mashvare hue haiñ
jo bārisheñ ab ke hone vaalī haiñ un ke qisse sunā rahā huuñ

us ek vīrān peḌ par ab ka.ī parindoñ ke ghoñsle haiñ
jo pichhle mausam meñ likh gayā thā vo naam maiñ DhūñDtā rahā huuñ

safar kī lazzat se baḌh ke manzil kā qurb to mo'tabar nahīñ hai
vo mil gayā aur maiñ abhī tak galī galī ḳhaak uḌā rahā huuñ

main bunda-bandi ke darmiyan apne ghar ki chhat par khaDa raha hun
charagh tha koi jis ke ham-rah raat-bhar bhigta raha hun

ye ab khula hai ki un mein mere nasib ki duriyan chhupi thin
main us ke hathon ki jin lakiron ko muddaton chumta raha hun

main sun chuka hun hawaon aur baadalon mein jo mashware hue hain
jo barishen ab ke hone wali hain un ke qisse suna raha hun

us ek viran peD par ab kai parindon ke ghonsle hain
jo pichhle mausam mein likh gaya tha wo nam main DhunDta raha hun

safar ki lazzat se baDh ke manzil ka qurb to mo'tabar nahin hai
wo mil gaya aur main abhi tak gali gali KHak uDa raha hun