sard rutoñ meñ logoñ ko garmī pahuñchāne vaale haath
barf ke jaise ThanDe kyuuñ haiñ uun banāne vaale haath

miTTī ke pyāloñ meñ har din sub.h se apnī shaam kareñ
rañg-birañge phūloñ se gul-dān sajāne vaale haath

aise the hālāt ki chhūTā un kā merā saath magar
yaad bahut aate haiñ vo chūḌī khankāne vaale haath

daftar se maiñ ghar lauTūñ to pūchhe mujh se tanhā.ī
kab ā.eñge rātoñ kī taqdīr jagāne vaale haath

sūraj chāñd sitāre jugnū jo chāho so nazr kareñ
nagrī nagrī āshāoñ ke diip jalāne vaale haath

jurm nahīñ hai sachchā.ī to bejā kyuuñ ma.atūb hue
sachchā.ī kā duniyā meñ parcham lahrāne vaale haath

dariyā meñ tūfān hai lekin hai ab bhī ummīd 'zafar'
paar lagā deñge ham ko patvār chalāne vaale haath

sard ruton mein logon ko garmi pahunchane wale hath
barf ke jaise ThanDe kyun hain un banane wale hath

miTTi ke pyalon mein har din subh se apni sham karen
rang-birange phulon se gul-dan sajaane wale hath

aise the haalat ki chhuTa un ka mera sath magar
yaad bahut aate hain wo chuDi khankane wale hath

daftar se main ghar lauTun to puchhe mujh se tanhai
kab aaenge raaton ki taqdir jagane wale hath

suraj chand sitare jugnu jo chaho so nazr karen
nagri nagri aashaon ke dip jalane wale hath

jurm nahin hai sachchai to beja kyun matub hue
sachchai ka duniya mein parcham lahrane wale hath

dariya mein tufan hai lekin hai ab bhi ummid 'zafar'
par laga denge hum ko patwar chalane wale hath

Source: Book : Mujalla Dastavez (Pg. 173) Author : Aziz Nabeel Publication : Edarah Dastavez (2010) Edition : 2010