Subscribe to our newsletter and get our newest updates

Baqi Siddiqui

  • Ghazal


kahta hai har makin se makan bolte raho


kahtā hai har makīñ se makāñ bolte raho
is chup meñ bhī hai jī kā ziyāñ bolte raho

har yaad har ḳhayāl hai lafzoñ kā silsila
ye mahfil-e-navā hai yahāñ bolte raho

mauj-e-sadā-e-dil pe ravāñ hai hisār-e-zīst
jis vaqt tak hai muñh meñ zabāñ bolte raho

apnā lahū hī rañg hai apnī tapish hī bū
ho fasl-e-gul ki daur-e-ḳhizāñ bolte raho

qadmoñ pe baar hote haiñ sunsān rāste
lambā safar hai ham-safarāñ bolte raho

hai zindagī bhī TuuTā huā aa.ina to kyā
tum bhī ba-tarz-e-shīsha-garāñ bolte raho

'bāqī' jo chup rahoge to uTTheñgī uñgliyāñ
hai bolnā bhī rasm-e-jahāñ bolte raho

kahta hai har makin se makan bolte raho
is chup mein bhi hai ji ka ziyan bolte raho

har yaad har KHayal hai lafzon ka silsila
ye mahfil-e-nawa hai yahan bolte raho

mauj-e-sada-e-dil pe rawan hai hisar-e-zist
jis waqt tak hai munh mein zaban bolte raho

apna lahu hi rang hai apni tapish hi bu
ho fasl-e-gul ki daur-e-KHizan bolte raho

qadmon pe bar hote hain sunsan raste
lamba safar hai ham-safaran bolte raho

hai zindagi bhi TuTa hua aaina to kya
tum bhi ba-tarz-e-shisha-garan bolte raho

'baqi' jo chup rahoge to uTThengi ungliyan
hai bolna bhi rasm-e-jahan bolte raho


Source:

Leave a comment

+