Subscribe to our newsletter and get our newest updates

Jafar Sahni

  • Ghazal


lamhon ke ishaare mein jafa dekh ke chup hai


lamhoñ ke ishāre meñ jafā dekh ke chup hai
kis vāste har ġham ko ḳhudā dekh ke chup hai

bādal kī riyāsat meñ sisaktā sā ujālā
shab-tāb kī ma.asūm ziyā dekh ke chup hai

dahshat ke havāle se pareshān kabhī thā
har shāḳh meñ ab phuul khilā dekh ke chup hai

sarsabz libāde meñ sajā.e thā jo sapnā
chehre kā abhī rañg uḌā dekh ke chup hai

dil-shād manāzir ke ahāte meñ zamāna
māyūs tasavvur ko khaḌā dekh ke chup hai

dastak kabhī tūfān kī pur-josh thī 'ja.afar'
bikhrī huī ḳhushbū kī ridā dekh ke chup hai

lamhon ke ishaare mein jafa dekh ke chup hai
kis waste har gham ko KHuda dekh ke chup hai

baadal ki riyasat mein sisakta sa ujala
shab-tab ki masum ziya dekh ke chup hai

dahshat ke hawale se pareshan kabhi tha
har shaKH mein ab phul khila dekh ke chup hai

sarsabz libaade mein sajae tha jo sapna
chehre ka abhi rang uDa dekh ke chup hai

dil-shad manazir ke ahate mein zamana
mayus tasawwur ko khaDa dekh ke chup hai

dastak kabhi tufan ki pur-josh thi 'jafar'
bikhri hui KHushbu ki rida dekh ke chup hai


Source: Book : Jada-e-manzil (Pg. 69) Author : Atish Bahawalpuri Publication : Nirali Duniya Publications (2001) Edition : 2001

Leave a comment

+