suno ye ġham kī siyah raat jaane vaalī hai
abhī azaan kī āvāz aane vaalī hai

tujhe yaqīn to shāyad na aa.egā lekin
ye sub.h koī karishma dikhāne vaalī hai

kise ḳhabar hai ki āñdhī chalā.e peḌ girā.e
yahī havā jo patañgeñ uḌāne vaalī hai

sameT bikhre hue kāġhzāt ko apne
koī sadā tujhe vāpas bulāne vaalī hai

tujhe bhī zulm se fursat na mil sakegī kabhī
mirī anā bhī kahāñ sar jhukāne vaalī hai

mirī ġhazal pe na.e log kyuuñ taḌapte haiñ
mirī ġhazal to purāne zamāne vaalī hai

suno ye gham ki siyah raat jaane wali hai
abhi azan ki aawaz aane wali hai

tujhe yaqin to shayad na aaega lekin
ye subh koi karishma dikhane wali hai

kise KHabar hai ki aandhi chalae peD girae
yahi hawa jo patangen uDane wali hai

sameT bikhre hue kaghzat ko apne
koi sada tujhe wapas bulane wali hai

tujhe bhi zulm se fursat na mil sakegi kabhi
meri ana bhi kahan sar jhukane wali hai

meri ghazal pe nae log kyun taDapte hain
meri ghazal to purane zamane wali hai

Source: Deewan-e-Waleeullah Muhib