Subscribe to our newsletter and get our newest updates

Ehsan Danish

  • Ghazal


kal raat kuchh ajib saman gham-kade mein tha


kal raat kuchh ajiib samāñ ġham-kade meñ thā
maiñ jis ko DhūñDhtā thā mire aa.ine meñ thā

jis kī nigāh meñ thiiñ sitāroñ kī manzileñ
vo mīr-e-kā.enāt usī qāfile meñ thā

rahgīr sun rahe the ye kis jashn-e-nau kā shor
kal raat merā zikr ye kis silsile meñ thā

raqsāñ the riñd jaise bhañvar meñ shafaq ke phuul
jo paañv paḌ rahā thā baḌe qā.ede meñ thā

chhiḌkā jise adam ke samundar pe aap ne
sahrā tamām ḳhaak ke us bulbule meñ thā

mannat-guzār-e-ahl-e-havas ho sakā na dil
haa.il mirā zamīr mire rāste meñ thā

hai farz is atā-e-junūñ kā bhī shukriya
lekin ye be-shumār karam kis sile meñ thā

ab aa ke kah rahe ho ki rusvā.ī se Daro
ye baal to kabhī kā mire ā.īne meñ thā

suntā huuñ sar-nigūñ the farishte mire huzūr
maiñ jaane apnī zaat ke kis marhale meñ thā

haiñ sabt mere dil pe zamāne kī Thokareñ
maiñ ek sañg-e-rāh thā jis rāste meñ thā

kuchh bhī na thā azal meñ ba-juz sho.ala-e-vajūd
haañ duur tak adam kā dhuāñ hāshiye meñ thā

maiñ ne jo apnā naam pukārā to hañs paḌā
ye mujh sā kaun shaḳhs mire rāste meñ thā

thī nuqta-e-nigāh tak āzādī-e-amal
parkār kī tarah maiñ ravāñ dā.ere meñ thā

zanjīr kī sadā thī na mauj-e-shamīm-e-zulf
ye kyā tilism un ke mire fāsle meñ thā

ab ruuh e'tirāf-e-badan se hai munharif
ik ye bhī sañg-e-mīl mire rāste meñ thā

'dānish' ka.ī nasheb-e-nazar se guzar ga.e
har riñd aa.ine kī tarah mai-kade meñ thā

kal raat kuchh ajib saman gham-kade mein tha
main jis ko DhunDhta tha mere aaine mein tha

jis ki nigah mein thin sitaron ki manzilen
wo mir-e-kaenat usi qafile mein tha

rahgir sun rahe the ye kis jashn-e-nau ka shor
kal raat mera zikr ye kis silsile mein tha

raqsan the rind jaise bhanwar mein shafaq ke phul
jo panw paD raha tha baDe qaede mein tha

chhiDka jise adam ke samundar pe aap ne
sahra tamam KHak ke us bulbule mein tha

mannat-guzar-e-ahl-e-hawas ho saka na dil
hail mera zamir mere raste mein tha

hai farz is ata-e-junun ka bhi shukriya
lekin ye be-shumar karam kis sile mein tha

ab aa ke kah rahe ho ki ruswai se Daro
ye baal to kabhi ka mere aaine mein tha

sunta hun sar-nigun the farishte mere huzur
main jaane apni zat ke kis marhale mein tha

hain sabt mere dil pe zamane ki Thokaren
main ek sang-e-rah tha jis raste mein tha

kuchh bhi na tha azal mein ba-juz shoala-e-wajud
han dur tak adam ka dhuan hashiye mein tha

main ne jo apna nam pukara to hans paDa
ye mujh sa kaun shaKHs mere raste mein tha

thi nuqta-e-nigah tak aazadi-e-amal
parkar ki tarah main rawan daere mein tha

zanjir ki sada thi na mauj-e-shamim-e-zulf
ye kya tilism un ke mere fasle mein tha

ab ruh e'tiraf-e-badan se hai munharif
ek ye bhi sang-e-mil mere raste mein tha

'danish' kai nasheb-e-nazar se guzar gae
har rind aaine ki tarah mai-kade mein tha


Source: Book : sheerazah (Pg. 23) Author : makhmoor saeedi,Parem Gopal Mittal Publication : P -K Publication 3072 Partap stareet gola Market -Daryaganj delhi-6 (1973) Edition : 1973

Leave a comment

+