Subscribe to our newsletter and get our newest updates

Iftikhar Arif

  • Ghazal


KHwab dekhne wali aankhen patthar hongi tab sochenge


ḳhvāb dekhne vaalī āñkheñ patthar hoñgī tab socheñge
sundar komal dhyān titliyāñ be-par hoñgī tab socheñge

ras barsāne vaale bādal aur taraf kyuuñ uḌ jaate haiñ
harī-bharī shādāb khetiyāñ banjar hoñgī tab socheñge

bastī kī dīvār pe kis ne an-honī bāteñ likh dī haiñ
is anjāne Dar kī bāteñ ghar ghar hoñgī tab socheñge

māñge ke phūloñ se kab tak rūp-sarūp kā maan baḌhegā
apne āñgan kī mahkāreñ be-ghar hoñgī tab socheñge

biitī rut kī sab pahchāneñ bhuul ga.e to phir kyā hogā
ga.e dinoñ kī yādeñ jab be-manzar hoñgī tab socheñge

aane vaale kal kā svāgat kaise hogā kaun karegā
jalte hue sūraj kī kirneñ sar par hoñgī tab socheñge

KHwab dekhne wali aankhen patthar hongi tab sochenge
sundar komal dhyan titliyan be-par hongi tab sochenge

ras barsane wale baadal aur taraf kyun uD jate hain
hari-bhari shadab khetiyan banjar hongi tab sochenge

basti ki diwar pe kis ne an-honi baaten likh di hain
is anjaane Dar ki baaten ghar ghar hongi tab sochenge

mange ke phulon se kab tak rup-sarup ka man baDhega
apne aangan ki mahkaren be-ghar hongi tab sochenge

biti rut ki sab pahchanen bhul gae to phir kya hoga
gae dinon ki yaaden jab be-manzar hongi tab sochenge

aane wale kal ka swagat kaise hoga kaun karega
jalte hue suraj ki kirnen sar par hongi tab sochenge


Leave a comment

+