Subscribe to our newsletter and get our newest updates

Tanveer Monis

  • Ghazal


teri chaal dhun teri sans sur mere dil ko aa ke sambhaal bhi


tirī chaal dhun tirī saañs sur mire dil ko aa ke sambhāl bhī
jo ye jal-tarañg zarā bajā to ye Daal degā dhamāl bhī

na uchhāl jhiil meñ kañkarī ki ye ḳhaufnāk sā khel hai
isī khel meñ na utar paḌe tirī aañkh par ye vabāl bhī

ka.ī log morcha-band ḳhauf kī ret meñ haiñ karam karam
tire haath meñ ye jo sañg hai kisī samt us ko uchhāl bhī

ai mukartī aañkh adāvateñ tū qayām bhī haiñ sabāt bhī
tire saath dushmanī ik taraf nahīñ dostī kī majāl bhī

tire tark-e-rāh ke faisle kā javāz maiñ nahīñ māñgtā
magar aane vaalā koī to vaqt uThā.egā ye savāl bhī

yad-e-baizā kī tū hai mālkin ai safed sañg kī mūrtī
tirī aañkh dariyā-e-nīl hai mirī raat koī nikāl bhī

teri chaal dhun teri sans sur mere dil ko aa ke sambhaal bhi
jo ye jal-tarang zara baja to ye Dal dega dhamal bhi

na uchhaal jhil mein kankari ki ye KHaufnak sa khel hai
isi khel mein na utar paDe teri aankh par ye wabaal bhi

kai log morcha-band KHauf ki ret mein hain karam karam
tere hath mein ye jo sang hai kisi samt us ko uchhaal bhi

ai mukarti aankh adawaten tu qayam bhi hain sabaat bhi
tere sath dushmani ek taraf nahin dosti ki majal bhi

tere tark-e-rah ke faisle ka jawaz main nahin mangta
magar aane wala koi to waqt uThaega ye sawal bhi

yad-e-baiza ki tu hai malkin ai safed sang ki murti
teri aankh dariya-e-nil hai meri raat koi nikal bhi


Leave a comment

+