ye kyā hālat banā rakkhī hai ye āsār kaise haiñ
bahut achchhā-bhalā chhoḌā thā ab bīmār kaise

vo mujh se pūchhne aa.ī hai kuchh likkhā nahīñ mujh par
maiñ us ko kaise samjhā.ūñ mire ash.ār kaise haiñ

mirī socheñ haiñ kaisī kaun in sochoñ kā markaz hai
jo mere zehn meñ palte haiñ vo afkār kaise haiñ

mire dil kā alāvoñ aaj tak dekhā nahīñ jis ne
vo kyā jaane ki sho.ale sūrat-e-iz.hār kaise haiñ

ye mantiq kaun samjhegā ki yaḳh-kamre kī ThanDak meñ
mire alfāz ke malbūs sho.ala-bār kaise haiñ

zarā sī ek farmā.ish bhī puurī kar nahīñ sakte
mohabbat karne vaale log bhī lāchār kaise haiñ

judā.ī kis tarah bartāv ham logoñ se kartī hai
mizājan ham-suḳhnavar be-dil-o-be-zār kaise haiñ

ye kya haalat bana rakkhi hai ye aasar kaise hain
bahut achchha-bhala chhoDa tha ab bimar kaise

wo mujh se puchhne aai hai kuchh likkha nahin mujh par
main us ko kaise samjhaun mere ashaar kaise hain

meri sochen hain kaisi kaun in sochon ka markaz hai
jo mere zehn mein palte hain wo afkar kaise hain

mere dil ka alawon aaj tak dekha nahin jis ne
wo kya jaane ki shoale surat-e-izhaar kaise hain

ye mantiq kaun samjhega ki yaKH-kamre ki ThanDak mein
mere alfaz ke malbus shoala-bar kaise hain

zara si ek farmaish bhi puri kar nahin sakte
mohabbat karne wale log bhi lachaar kaise hain

judai kis tarah bartaw hum logon se karti hai
mizajan ham-suKHnawar be-dil-o-be-zar kaise hain

Source: Book : Diwan-e-jamila (Pg. 244) Author : Jamila Khuda Bakhsh Publication : Khuda Bakhsh Oriental Public Library, Patna (2005) Edition : 2005