koī nazar kisī aalam meñ kāmyāb nahīñ
tilism-e-sūrat-o-ma.anī tirā javāb nahīñ

nafas nafas meñ agar zauq-e-inqalāb nahīñ
fareb-e-mastī-e-pindār hai shabāb nahīñ

ba-qadr-e-zarf talabgār hai urūj-o-zavāl
zamīñ pe hai vahī zarra jo āftāb nahīñ

hazār saal bhī ġhaflat ke de nahīñ sakte
us ek lamha kī qīmat jo sirf ḳhvāb nahīñ

hujūm-e-shauq meñ koī nazar samajh na sakī
shu.ūr-e-dīd kī ta.alīm thī hijāb nahīñ

barā-e-afv gunahgār kī taraf jo uThe
us ik nigāh-e-karam kā koī javāb nahīñ

diloñ ko sīnoñ meñ dhaḌkā ke rah gayā hai 'kaif'
vo inqalāb kā dhokā thā inqalāb nahīñ

koi nazar kisi aalam mein kaamyab nahin
tilism-e-surat-o-mani tera jawab nahin

nafas nafas mein agar zauq-e-inqalab nahin
fareb-e-masti-e-pindar hai shabab nahin

ba-qadr-e-zarf talabgar hai uruj-o-zawal
zamin pe hai wahi zarra jo aaftab nahin

hazar sal bhi ghaflat ke de nahin sakte
us ek lamha ki qimat jo sirf KHwab nahin

hujum-e-shauq mein koi nazar samajh na saki
shuur-e-did ki talim thi hijab nahin

bara-e-afw gunahgar ki taraf jo uThe
us ek nigah-e-karam ka koi jawab nahin

dilon ko sinon mein dhaDka ke rah gaya hai 'kaif'
wo inqalab ka dhoka tha inqalab nahin

Source: Book : Pakistani Adab (Pg. 499) Author : Dr. Rashid Amjad Publication : Pakistan Academy of Letters, Islambad, Pakistan (2009) Edition : 2009