be-kaif masarrat bhī musībat sī lage hai
ai dost mujhe ġham kī zarūrat sī lage hai

rūdād mohabbat kī kisī ko na sunāo
kuchh log haiñ jin ko ye shikāyat sī lage hai

dam toḌtī qadroñ ko bachāne kī uchhal-kūd
fitrat ke usūloñ se baġhāvat sī lage hai

duniyā-e-tamāshā to badaltī hai ka.ī rañg
gah ḳhvāb lage gaah haqīqat sī lage hai

ehsās kā dhokā hai ye jazbāt kā jaadū
apnoñ kī adāvat bhī mohabbat sī lage hai

be-rabt ḳhayāloñ ke shagūfoñ kī latāfat
majbūr ġharīboñ kī zehānat sī lage hai

'tālib' ko sharāfat pe baḌā naaz thā lekin
ab us kī sharāfat bhī himāqat sī lage hai

be-kaif masarrat bhi musibat si lage hai
ai dost mujhe gham ki zarurat si lage hai

rudad mohabbat ki kisi ko na sunao
kuchh log hain jin ko ye shikayat si lage hai

dam toDti qadron ko bachane ki uchhal-kud
fitrat ke usulon se baghawat si lage hai

duniya-e-tamasha to badalti hai kai rang
gah KHwab lage gah haqiqat si lage hai

ehsas ka dhoka hai ye jazbaat ka jadu
apnon ki adawat bhi mohabbat si lage hai

be-rabt KHayalon ke shagufon ki latafat
majbur gharibon ki zehanat si lage hai

'talib' ko sharafat pe baDa naz tha lekin
ab us ki sharafat bhi himaqat si lage hai