abhī dekhī kahāñ haiñ aap ne sab ḳhūbiyāñ merī
nigāheñ DhūñDhtī haiñ aap kī bas ḳhāmiyāñ merī

mirā kirdār duniyāñ meñ shahādat se munavvar hai
nazar aa.eñ falak par sab ko raushan surḳhiyāñ merī

vahāñ barsoñ talak phūloñ kī khetī hotī rahtī hai
baras jaatī haiñ jin ḳhittoñ pe jā kar badliyāñ merī

maiñ har nekī ko apne dushmanoñ meñ baañT detī huuñ
samar-āvar rahā kartī haiñ is se nekiyāñ merī

zamāna chāhe jo samjhe anā ke saath zinda huuñ
tumheñ bhī jiit legī ek din ye ḳhūbiyāñ merī

kisī bhī ma.arke par ab talak haarī nahīñ huuñ maiñ
mirā zevar rahā hai dostoñ ḳhuddāriyāñ merī

jise tum raakh samjhe ho abhī tak aag hai us meñ
kuredo mat jalā degī tumheñ chiñgāriyāñ merī

'sabīn' aksar maiñ dastarḳhavāñ se uTh jaatī huuñ bin khaa.e
kisī bhūke ke kaam aa jaa.eñ shāyad roTiyāñ merī

abhi dekhi kahan hain aap ne sab KHubiyan meri
nigahen DhunDhti hain aap ki bas KHamiyan meri

mera kirdar duniyan mein shahadat se munawwar hai
nazar aaen falak par sab ko raushan surKHiyan meri

wahan barson talak phulon ki kheti hoti rahti hai
baras jati hain jin KHitton pe ja kar badliyan meri

main har neki ko apne dushmanon mein banT deti hun
samar-awar raha karti hain is se nekiyan meri

zamana chahe jo samjhe ana ke sath zinda hun
tumhein bhi jit legi ek din ye KHubiyan meri

kisi bhi marke par ab talak haari nahin hun main
mera zewar raha hai doston KHuddariyan meri

jise tum rakh samjhe ho abhi tak aag hai us mein
kuredo mat jala degi tumhein chingariyan meri

'sabin' aksar main dastarKHawan se uTh jati hun bin khae
kisi bhuke ke kaam aa jaen shayad roTiyan meri

Pachas Sala Intekhab"