aisā tah-e-aflāk ḳharāba nahīñ koī
us dasht se zinda kabhī lauTā nahīñ koī

haibat vo sadāoñ meñ ki larze dar-o-dīvār
guzre vo shab-o-roz ki soyā nahīñ koī

vīrān sī vīrān huī dhyān kī bastī
chehra kisī chilman se jhalaktā nahīñ koī

sar phoḌ ke lauT aatī hai jaatī hai jo āvāz
kyā gumbad-e-āfāq meñ rasta nahīñ koī

ik aisī masāfat hai ki saa.at bhī kaThin hai
sadiyoñ kā safar aur kahīñ saaya nahīñ koī

be-ism nahīñ khultā dar-e-ganj-e-tilismāt
satroñ meñ ḳhazīne haiñ tamāshā nahīñ koī

dekhī hai 'bashīr' ahl-e-nazar kī bhī rasā.ī
bāteñ mirī samjhe mujhe samjhā nahīñ koī

aisa tah-e-aflak KHaraba nahin koi
us dasht se zinda kabhi lauTa nahin koi

haibat wo sadaon mein ki larze dar-o-diwar
guzre wo shab-o-roz ki soya nahin koi

viran si viran hui dhyan ki basti
chehra kisi chilman se jhalakta nahin koi

sar phoD ke lauT aati hai jati hai jo aawaz
kya gumbad-e-afaq mein rasta nahin koi

ek aisi masafat hai ki saat bhi kaThin hai
sadiyon ka safar aur kahin saya nahin koi

be-ism nahin khulta dar-e-ganj-e-tilismat
satron mein KHazine hain tamasha nahin koi

dekhi hai 'bashir' ahl-e-nazar ki bhi rasai
baaten meri samjhe mujhe samjha nahin koi

Pachas Sala Intekhab"