hālat-e-bīmār-e-ġham par jis ko hairānī nahīñ
asal meñ us aadmī meñ ḳhū-e-insānī nahīñ

aisī bedardī se us ko mat bahāo ḳhaak par
ḳhūn-e-insāñ ḳhūn-e-insāñ hai koī paanī nahīñ

ruuh kā rishta kabhī kyā toḌ paa.ī hai qazā
zindagī faanī hai lekin ruuh to faanī nahīñ

jis kī ḳhushbū se mo.attar raat bhar rahtā thā maiñ
mere ghar ke paas ab vo raat kī raanī nahīñ

maiñ ta.ajjub meñ huuñ ye kaisā zamāna aa gayā
chāñd meñ ThanDak nahīñ sūraj meñ tābānī nahīñ

phir tire uupar na TuuTe kyuuñ azāboñ kā pahāḌ
tere andar ik zarā bhī bū-e-īmānī nahīñ

yuuñ na apne chāhne vaale ko rusvā kījiye
ye to andāz-e-sulūk-e-dilbar-e-jānī nahīñ

kyuuñ nahīñ tūfāñ kā manzar terī chashm-e-shauq meñ
kyuuñ tire dariyā-e-dil meñ ab vo tuġhyānī nahīñ

mutma.in hai ishq bhī shām-e-alam ke bāvajūd
husn ke chehre pe bhī aks-e-pareshānī nahīñ

ishq meñ bhī tū na pā.egā kahīñ merā javāb
jān-e-man jo husn meñ koī tirā saanī nahīñ

ai 'zafar' paale hue haiñ vo bhī duniyā kī havas
ab faqīr-e-ishq meñ bhī bū-e-irfānī nahīñ

haalat-e-bimar-e-gham par jis ko hairani nahin
asal mein us aadmi mein KHu-e-insani nahin

aisi bedardi se us ko mat bahao KHak par
KHun-e-insan KHun-e-insan hai koi pani nahin

ruh ka rishta kabhi kya toD pai hai qaza
zindagi fani hai lekin ruh to fani nahin

jis ki KHushbu se moattar raat bhar rahta tha main
mere ghar ke pas ab wo raat ki rani nahin

main tajjub mein hun ye kaisa zamana aa gaya
chand mein ThanDak nahin suraj mein tabani nahin

phir tere upar na TuTe kyun azabon ka pahaD
tere andar ek zara bhi bu-e-imani nahin

yun na apne chahne wale ko ruswa kijiye
ye to andaz-e-suluk-e-dilbar-e-jaani nahin

kyun nahin tufan ka manzar teri chashm-e-shauq mein
kyun tere dariya-e-dil mein ab wo tughyani nahin

mutmain hai ishq bhi sham-e-alam ke bawajud
husn ke chehre pe bhi aks-e-pareshani nahin

ishq mein bhi tu na paega kahin mera jawab
jaan-e-man jo husn mein koi tera sani nahin

ai 'zafar' pale hue hain wo bhi duniya ki hawas
ab faqir-e-ishq mein bhi bu-e-irfani nahin