hosh manzil kho ke manzil kā patā paate haiñ log
tark-e-lazzat meñ to kuchh lazzat sivā paate haiñ log

dard ke māroñ ko hī dard-āshnā paate haiñ log
be-vafāoñ meñ kahāñ bū-e-vafā paate haiñ log

nutq qāsir hai bayāñ se vo mazā paate haiñ log
mujh se pūchho ishq meñ gum ho ke kyā paate haiñ log

ba.ad istiġhrāq haath aa.ī hai bas matlab kī baat
Duub kar gahre meñ durr-e-be-bahā paate haiñ log

karte apne se baḌoñ kā haiñ jo dil se ehtirām
rahte haiñ ḳhush yuuñ buzurgoñ kī duā paate haiñ log

manzil-e-dār-o-rasan ho yā salīb-e-sarfarāz
apne hī naqsh-e-kaf-e-pā jā-ba-jā paate haiñ log

bhuul kar ḳhud ko ḳhudā kī yaad meñ hote haiñ mahv
nāḳhudā ko bhī bhañvar meñ bā-ḳhudā paate haiñ log

be-ḳhudī meñ rāz-e-dil kah Dālte haiñ be-jhijak
piine vāloñ ko nashe meñ pārsā paate haiñ log

chhāñv kī dhuup aur bārish meñ hai khultī ahmiyat
sar chhupāte haiñ jahāñ saaya zarā paate haiñ log

ḳhud meñ aatī haiñ nazar hirs-o-havas kī bastiyāñ
dīda-e-bīnā kabhī jab apne vā paate haiñ log

lutf-e-ḳhās us kā samajh kar dil se karte haiñ qubūl
jo bhī dast-e-nāz se achchhā burā paate haiñ log

lagtā ḳhālī zehn shaitāñ kī dukāñ ho jis tarah
ghar meñ ghuste haiñ jo darvāza khulā paate haiñ log

qadr-o-qīmat dard-e-dil kī ahl-e-dil se pūchhiye
dard ko darmān-e-dard-e-lā-davā paate haiñ log

jauhar-e-zātī mohabbat zabt hai us kā shi.ār
husn-e-ḳhud-bīñ ko azal se ḳhud-numā paate haiñ log

ḳhāna-e-dil to mohabbat meñ rahā bāġh-o-bahār
aur ghar hoñge jinheñ vahshat-sarā paate haiñ log

dast-e-aqdas se jo haath aa.e ġhanīmat jāniye
bad-duā ko bhī buzurgoñ kī duā paate haiñ log

bhaa.ī ko kar de judā bhaa.ī se roTī kyā ajab
khāne meñ ḳhud apne hoñToñ ko judā paate haiñ log

us kā lutf-e-ḳhās jo ye istitā.at hai nasīb
bār-e-ġham juz ibn-e-ādam kyā uThā paate haiñ log

chāñdnī rātoñ meñ mauj-e-āb-e-jū ke saath saath
'māhir'-e-ḳhush-gu ko bhī naġhma-sarā paate haiñ log

hosh manzil kho ke manzil ka pata pate hain log
tark-e-lazzat mein to kuchh lazzat siwa pate hain log

dard ke maron ko hi dard-ashna pate hain log
be-wafaon mein kahan bu-e-wafa pate hain log

nutq qasir hai bayan se wo maza pate hain log
mujh se puchho ishq mein gum ho ke kya pate hain log

baad istighraq hath aai hai bas matlab ki baat
Dub kar gahre mein durr-e-be-baha pate hain log

karte apne se baDon ka hain jo dil se ehtiram
rahte hain KHush yun buzurgon ki dua pate hain log

manzil-e-dar-o-rasan ho ya salib-e-sarfaraaz
apne hi naqsh-e-kaf-e-pa ja-ba-ja pate hain log

bhul kar KHud ko KHuda ki yaad mein hote hain mahw
naKHuda ko bhi bhanwar mein ba-KHuda pate hain log

be-KHudi mein raaz-e-dil kah Dalte hain be-jhijak
pine walon ko nashe mein parsa pate hain log

chhanw ki dhup aur barish mein hai khulti ahmiyat
sar chhupate hain jahan saya zara pate hain log

KHud mein aati hain nazar hirs-o-hawas ki bastiyan
dida-e-bina kabhi jab apne wa pate hain log

lutf-e-KHas us ka samajh kar dil se karte hain qubul
jo bhi dast-e-naz se achchha bura pate hain log

lagta KHali zehn shaitan ki dukan ho jis tarah
ghar mein ghuste hain jo darwaza khula pate hain log

qadr-o-qimat dard-e-dil ki ahl-e-dil se puchhiye
dard ko darman-e-dard-e-la-dawa pate hain log

jauhar-e-zati mohabbat zabt hai us ka shiar
husn-e-KHud-bin ko azal se KHud-numa pate hain log

KHana-e-dil to mohabbat mein raha bagh-o-bahaar
aur ghar honge jinhen wahshat-sara pate hain log

dast-e-aqdas se jo hath aae ghanimat jaaniye
bad-dua ko bhi buzurgon ki dua pate hain log

bhai ko kar de juda bhai se roTi kya ajab
khane mein KHud apne honTon ko juda pate hain log

us ka lutf-e-KHas jo ye istitaat hai nasib
bar-e-gham juz ibn-e-adam kya uTha pate hain log

chandni raaton mein mauj-e-ab-e-ju ke sath sath
'mahir'-e-KHush-gu ko bhi naghma-sara pate hain log

Source: Saamaan-e-Sar-Khushi