Subscribe to our newsletter and get our newest updates

Imran Badayuni

  • Ghazal


main sari umr ahd-e-wafa mein laga raha


maiñ saarī umr ahd-e-vafā meñ lagā rahā
anjām kah rahā hai ḳhatā meñ lagā rahā

saare purāne zaḳhm na.e zaḳhm ne bhare
bekār itne din maiñ davā meñ lagā rahā

aisā nahīñ ki chāñd na utrā ho baam par
maiñ hī tamām raat hayā meñ lagā rahā

ai aql aur hogā koī us kī shakl kā
dil kaise maan le vo jafā meñ lagā rahā

ghar kar liyā udaas fazāoñ ne dil meñ maiñ
bāhar kī ḳhush-gavār fazā meñ lagā rahā

kyā hai ye zindagī vo batā.egā kis tarah
jo shaḳhs saarī umr qazā meñ lagā rahā

sūraj to jā ke chain se bistar pe so gayā
shab bhar magar charāġh havā meñ lagā rahā

mujh se namāz-e-ishq mukammal nahīñ huī
kis muñh se maiñ kahūñ ki ḳhudā meñ lagā rahā

bahrā na mujh ko kar de ye ḳhāmoshiyoñ kā shor
keval isī liye maiñ sadā meñ lagā rahā

kyuuñ mere haq meñ faisla utrā nahīñ kabhī
maiñ bhī to us ke saath duā meñ lagā rahā

vo chāhtā hai kyā ye mujhe thī ḳhabar magar
meñ us ke saath saath duā meñ lagā rahā

main sari umr ahd-e-wafa mein laga raha
anjam kah raha hai KHata mein laga raha

sare purane zaKHm nae zaKHm ne bhare
bekar itne din main dawa mein laga raha

aisa nahin ki chand na utra ho baam par
main hi tamam raat haya mein laga raha

ai aql aur hoga koi us ki shakl ka
dil kaise man le wo jafa mein laga raha

ghar kar liya udas fazaon ne dil mein main
bahar ki KHush-gawar faza mein laga raha

kya hai ye zindagi wo bataega kis tarah
jo shaKHs sari umr qaza mein laga raha

suraj to ja ke chain se bistar pe so gaya
shab bhar magar charagh hawa mein laga raha

mujh se namaz-e-ishq mukammal nahin hui
kis munh se main kahun ki KHuda mein laga raha

bahra na mujh ko kar de ye KHamoshiyon ka shor
kewal isi liye main sada mein laga raha

kyun mere haq mein faisla utra nahin kabhi
main bhi to us ke sath dua mein laga raha

wo chahta hai kya ye mujhe thi KHabar magar
mein us ke sath sath dua mein laga raha


Leave a comment

+