Subscribe to our newsletter and get our newest updates

Fani Badayuni

  • Ghazal


be-KHudi pe tha fani kuchh na iKHtiyar apna


be-ḳhudī pe thā 'fānī' kuchh na iḳhtiyār apnā
umr bhar kiyā nāhaq ham ne intizār apnā

tāb-e-zabt-e-ġham ne bhī de diyā javāb āḳhir
un ke dil se uThtā hai aaj e'tibār apnā

ishq zindagī Thahrā lekin ab ye mushkil hai
zindagī se hotā hai ahd ustuvār apnā

shikva barmalā karte ḳhair ye to kyā karte
haañ magar jo ban paḌtā shikva ek baar apnā

ġham hī jī kā dushman thā ġham se duur rahte the
ġham hī rah gayā āḳhir ek ġham-gusār apnā

le gayā chaman ko bhī mausam-e-bahār aa kar
ab qafas kā gosha hai hāsil-e-bahār apnā

jhuuT hī sahī vaada kyuuñ yaqīñ na kar lete
baat dil-fareb un kī dil umīd-vār apnā

inqilāb-e-ālam meñ varna der hī kyā thī
un ke āstāñ tak thā ḳhair se ġhubār apnā

dil hai muztarib 'fānī' aañkh mahv-e-hairat hai
dil ne de diyā shāyad aañkh ko qarār apnā

be-KHudi pe tha 'fani' kuchh na iKHtiyar apna
umr bhar kiya nahaq hum ne intizar apna

tab-e-zabt-e-gham ne bhi de diya jawab aaKHir
un ke dil se uThta hai aaj e'tibar apna

ishq zindagi Thahra lekin ab ye mushkil hai
zindagi se hota hai ahd ustuwar apna

shikwa barmala karte KHair ye to kya karte
han magar jo ban paDta shikwa ek bar apna

gham hi ji ka dushman tha gham se dur rahte the
gham hi rah gaya aaKHir ek gham-gusar apna

le gaya chaman ko bhi mausam-e-bahaar aa kar
ab qafas ka gosha hai hasil-e-bahaar apna

jhuT hi sahi wada kyun yaqin na kar lete
baat dil-fareb un ki dil umid-war apna

inqilab-e-alam mein warna der hi kya thi
un ke aastan tak tha KHair se ghubar apna

dil hai muztarib 'fani' aankh mahw-e-hairat hai
dil ne de diya shayad aankh ko qarar apna

RECITATIONS Nomaan Shauque



00:00/00:00 be-KHudi pe tha fani kuchh na iKHtiyar apna Nomaan Shauque

Leave a comment

+