ai asīrān-e-tilism-e-shab-e-ġham so jaao
sham-e-ummīd kī lo ho ga.ī kam so jaao

chāñd-tāroñ kī chamak ho ga.ī kam so jaao
sarhad-e-sub.h meñ haiñ shab ke qadam so jaao

ab na jaago kisī guzrī huī shab kī yaado
tum ko ham jāgne vāloñ kī qasam so jaao

bujh ga.ī sham.a bhī parvāne bhī dam toḌ chuke
un ke aane kī ab ummīd hai kam so jaao

DabDabā.ī huī āñkho tumheñ ashkoñ kī qasam
khul na jaa.e kahīñ ulfat kā bharam so jaao

ġham ke māroñ ko sukūñ miltā hai maiḳhāne meñ
jaao chheḌo na hameñ shaiḳh-e-haram so jaao

dil dhaḌakne kī bhī āvāz hai sākit 'māhir'
ab nahīñ koī sharīk-e-shab-e-ġham so jaao

ai asiran-e-tilism-e-shab-e-gham so jao
sham-e-ummid ki lo ho gai kam so jao

chand-taron ki chamak ho gai kam so jao
sarhad-e-subh mein hain shab ke qadam so jao

ab na jago kisi guzri hui shab ki yaado
tum ko hum jagne walon ki qasam so jao

bujh gai shama bhi parwane bhi dam toD chuke
un ke aane ki ab ummid hai kam so jao

DabDabai hui aankho tumhein ashkon ki qasam
khul na jae kahin ulfat ka bharam so jao

gham ke maron ko sukun milta hai maiKHane mein
jao chheDo na hamein shaiKH-e-haram so jao

dil dhaDakne ki bhi aawaz hai sakit 'mahir'
ab nahin koi sharik-e-shab-e-gham so jao

Source: Rooh-e-Ghazal,Pachas Sala Intekhab