Subscribe to our newsletter and get our newest updates

Jameel Mazhari

  • Ghazal


kisi ka KHun sahi ek nikhaar de to diya


kisī kā ḳhuun sahī ik nikhār de to diyā
ḳhizāñ ko tum ne libās-e-bahār de to diyā

mire shu.ūr ko kaliyāñ ab aur kyā detīñ
tasavvur-e-lab-e-rañgīn-e-yār de to diyā

ab aur ḳhizr se kyā chāhtī hai pyaas mirī
sarāb-e-rahmat-e-parvar-digār de to diyā

agarche jabr hai ye bhī magar ġhanīmat jaan
ki ek jazba-e-be-iḳhtiyār de to diyā

ye aur baat ki dāman ko phuul de na sakī
magar bahār ne talvoñ ko ḳhaar de to diyā

bahār aa.e na aa.e magar lahū ne mire
chaman kī ḳhaak ko ik e'tibār de to diyā

ummīdeñ chhīn liiñ us ne to phir gila kyā hai
qarār maañg rahe the qarār de to diyā

kare ḳhudā se gila kyuuñ kisī kī majbūrī
kisī ke dil pe sahī iḳhtiyār de to diyā

'jamīl' us ātish-e-ruḳh ko havā na do itnī
ab aur chāhiye kyā ik sharār de to diyā

kisi ka KHun sahi ek nikhaar de to diya
KHizan ko tum ne libas-e-bahaar de to diya

mere shuur ko kaliyan ab aur kya detin
tasawwur-e-lab-e-rangin-e-yar de to diya

ab aur KHizr se kya chahti hai pyas meri
sarab-e-rahmat-e-parwar-digar de to diya

agarche jabr hai ye bhi magar ghanimat jaan
ki ek jazba-e-be-iKHtiyar de to diya

ye aur baat ki daman ko phul de na saki
magar bahaar ne talwon ko KHar de to diya

bahaar aae na aae magar lahu ne mere
chaman ki KHak ko ek e'tibar de to diya

ummiden chhin lin us ne to phir gila kya hai
qarar mang rahe the qarar de to diya

kare KHuda se gila kyun kisi ki majburi
kisi ke dil pe sahi iKHtiyar de to diya

'jamil' us aatish-e-ruKH ko hawa na do itni
ab aur chahiye kya ek sharar de to diya

RECITATIONS Nomaan Shauque



00:00/00:00 kisi ka KHun sahi ek nikhaar de to diya Nomaan Shauque

Pachas Sala Intekhab"

Leave a comment

+