Subscribe to our newsletter and get our newest updates

Yaqoob Usmani

  • Ghazal


shauq ki kam-nigahi bhi hai gawara mujhko


shauq kī kam-nigahī bhī hai gavārā mujh ko
ġham to ġham aaj ḳhushī bhī hai gavārā mujh ko

justujū saath hai sham-e-rah-e-manzil ban kar
apnī be-rāh-ravī bhī hai gavārā mujh ko

lazzat-e-zīst ba-har-taur sabhī ko hai aziiz
zahr-e-mīnā-e-ḳhudī bhī hai gavārā mujh ko

sozan-e-rahm-o-karam kartī hai kyuuñ sa.ī-e-rafū
chāk-dāmān-e-tahī bhī hai gavārā mujh ko

aap lillāh na farmā.eñ ziyāda zahmat
ab tavajjoh kī kamī bhī hai gavārā mujh ko

sirf tar-dāmanī-e-dil hī pe isrār nahīñ
chashm-e-pur-nam kī kamī bhī hai gavārā mujh ko

jur.at-e-arz-e-tamannā se huuñ bad-zan 'yāqūb'
zabt kī kam-suḳhanī bhī hai gavārā mujh ko

shauq ki kam-nigahi bhi hai gawara mujh ko
gham to gham aaj KHushi bhi hai gawara mujh ko

justuju sath hai sham-e-rah-e-manzil ban kar
apni be-rah-rawi bhi hai gawara mujh ko

lazzat-e-zist ba-har-taur sabhi ko hai aziz
zahr-e-mina-e-KHudi bhi hai gawara mujh ko

sozan-e-rahm-o-karam karti hai kyun sai-e-rafu
chaak-daman-e-tahi bhi hai gawara mujh ko

aap lillah na farmaen ziyaada zahmat
ab tawajjoh ki kami bhi hai gawara mujh ko

sirf tar-damani-e-dil hi pe israr nahin
chashm-e-pur-nam ki kami bhi hai gawara mujh ko

jurat-e-arz-e-tamanna se hun bad-zan 'yaqub'
zabt ki kam-suKHani bhi hai gawara mujh ko


Source: Funoon(Jadeed Ghazal Number: Volume-002)

Leave a comment

+