rah-e-hayāt meñ vo bhī maqām aa.egā
yagāna kaam na begāna kaam aa.egā

surūr-e-bāda-e-ranj-o-ġham-e-hayāt kabhī
na kaam aayā kisī ke na kaam aa.egā

hamārī zindagī-e-muḳhtasar kā sarmāya
hamāre ba.ad zamāne ke kaam aa.egā

badal chukī hai fazā ab nizām-e-ālam kī
na kaam daana kisī ke na daam aa.egā

yaqīñ hai tishna-laboñ ko ki un kī mahfil meñ
vo jab bhī aa.egā bāda-ba-jām aa.egā

vo jis kī yaad satātī hai rāt-din 'fāriġh'
na qabl-e-sub.h na vo ba.ad-e-shām aa.egā

rah-e-hayat mein wo bhi maqam aaega
yagana kaam na begana kaam aaega

surur-e-baada-e-ranj-o-gham-e-hayat kabhi
na kaam aaya kisi ke na kaam aaega

hamari zindagi-e-muKHtasar ka sarmaya
hamare baad zamane ke kaam aaega

badal chuki hai faza ab nizam-e-alam ki
na kaam dana kisi ke na dam aaega

yaqin hai tishna-labon ko ki un ki mahfil mein
wo jab bhi aaega baada-ba-jam aaega

wo jis ki yaad satati hai raat-din 'farigh'
na qabl-e-subh na wo baad-e-sham aaega