ḳhamosh nazroñ se husn-e-butāñ kī baat kareñ
na lab pe aa.ī jo us dāstāñ kī baat kareñ

rah-e-junūñ meñ bhaTakte kahāñ kahāñ pahuñche
kahāñ kahāñ kī sunā.eñ kahāñ kī baat kareñ

jigar ke daaġh dikhāne se fā.eda kyā hai
abas hai mahz ke zor-e-zamāñ kī baat kareñ

na bhuul jaa.e zamāna vafā kī qadroñ ko
miTe jo ishq meñ un ke nishāñ kī baat kareñ

jabīn-e-shauq kā sajda yahāñ vahāñ kyoñ ho
jahāñ ho azmat-e-sar ham vahāñ kī baat kareñ

qadam qadam pe guzarte haiñ imtihāñ kitne
chalo ki aaj na.e imtihāñ kī baat kareñ

ye yād-e-lutf-e-bahārāñ bhī kam nahīñ hai 'habīb'
bharī ḳhizāñ meñ bhī kyā ham ḳhizāñ kī baat kareñ

KHamosh nazron se husn-e-butan ki baat karen
na lab pe aai jo us dastan ki baat karen

rah-e-junun mein bhaTakte kahan kahan pahunche
kahan kahan ki sunaen kahan ki baat karen

jigar ke dagh dikhane se faeda kya hai
abas hai mahz ke zor-e-zaman ki baat karen

na bhul jae zamana wafa ki qadron ko
miTe jo ishq mein un ke nishan ki baat karen

jabin-e-shauq ka sajda yahan wahan kyon ho
jahan ho azmat-e-sar hum wahan ki baat karen

qadam qadam pe guzarte hain imtihan kitne
chalo ki aaj nae imtihan ki baat karen

ye yaad-e-lutf-e-bahaaran bhi kam nahin hai 'habib'
bhari KHizan mein bhi kya hum KHizan ki baat karen

RECITATIONS Jazim Sharma



00:00/00:00 khamosh nazron se Jazim Sharma