kuchh husn-e-vafā ke dīvāne phir ishq kī raah meñ kaam aa.e
ai kaash tamāshā karne ko ḳhud tū bhī kanār-e-bām aa.e

alfāz na the āvāz na thī naama bhī na thā qāsid bhī na thā
aise bhī ka.ī paiġhām ga.e aise bhī ka.ī paiġhām aa.e

shab mai-ḳhāne kī mahfil meñ arbab-e-jafā kā zikr chalā
chup sunte rahe ham Darte rahe terā bhī na un meñ naam aa.e

ham garche falak-parvāz bhī haiñ aur tāroñ ke hamrāz bhī haiñ
sayyād pe aayā rahm hameñ ḳhud shauq se zer-e-dām aa.e

phir lāla-o-gul kī nagrī se iThlātī huī aa.ī hai sabā
ai ahl-e-qafas chup-chāp suno! phūloñ ke tumheñ paiġhām aa.e

ye baat alag hai paas rahā kuchh tishna-labī kī ġhairat kā
ham par bhī rahā saaqī kā karam ham tak bhī bahut se jaam aa.e

shab kitnī bojhal bojhal hai ham tanhā tanhā baiThe haiñ
aise meñ tumhārī yaad aa.ī jis tarah koī ilhām aa.e

kuchh husn-e-wafa ke diwane phir ishq ki rah mein kaam aae
ai kash tamasha karne ko KHud tu bhi kanar-e-baam aae

alfaz na the aawaz na thi nama bhi na tha qasid bhi na tha
aise bhi kai paigham gae aise bhi kai paigham aae

shab mai-KHane ki mahfil mein arbab-e-jafa ka zikr chala
chup sunte rahe hum Darte rahe tera bhi na un mein nam aae

hum garche falak-parwaz bhi hain aur taron ke hamraaz bhi hain
sayyaad pe aaya rahm hamein KHud shauq se zer-e-dam aae

phir lala-o-gul ki nagri se iThlati hui aai hai saba
ai ahl-e-qafas chup-chap suno! phulon ke tumhein paigham aae

ye baat alag hai pas raha kuchh tishna-labi ki ghairat ka
hum par bhi raha saqi ka karam hum tak bhi bahut se jam aae

shab kitni bojhal bojhal hai hum tanha tanha baiThe hain
aise mein tumhaari yaad aai jis tarah koi ilham aae

Source: Book : Shora-e-London (Pg. 71) Author : Jauhar Zahiri Publication : Books From India (U.K) Ltd. 45, Museum Street,Londan W.C-1 (1985) Edition : 1985