Subscribe to our newsletter and get our newest updates

Ehsan Danish

  • Ghazal


jo le ke unki tamanna ke KHwab niklega


jo le ke un kī tamannā ke ḳhvāb niklegā
ba-ijz-o-shauq ba-hāl-e-ḳharāb niklegā

jo rañg baañT ke jaatā hai tinke tinke ko
adū zamīñ kā yahī āftāb niklegā

bharī huī hai ka.ī din se dhund galiyoñ meñ
na jaane shahr se kab ye azaab niklegā

jo de rahe ho zamīñ ko vahī zamīñ degī
babūl bo.e to kaise gulāb niklegā

abhī to sub.h huī hai shab-e-tamannā kī
baheñge ashk to āñkhoñ se ḳhvāb niklegā

mire gunāh bahut haiñ magar taqābul meñ
usī kā lutf-o-karam be-hisāb niklegā

milā kisī ko na 'dānish' kuchh aarzū ke ḳhilāf
pas-e-fanā bhī yahī intiḳhāb niklegā

jo le ke un ki tamanna ke KHwab niklega
ba-ijz-o-shauq ba-haal-e-KHarab niklega

jo rang banT ke jata hai tinke tinke ko
adu zamin ka yahi aaftab niklega

bhari hui hai kai din se dhund galiyon mein
na jaane shahr se kab ye azab niklega

jo de rahe ho zamin ko wahi zamin degi
babul boe to kaise gulab niklega

abhi to subh hui hai shab-e-tamanna ki
bahenge ashk to aankhon se KHwab niklega

mere gunah bahut hain magar taqabul mein
usi ka lutf-o-karam be-hisab niklega

mila kisi ko na 'danish' kuchh aarzu ke KHilaf
pas-e-fana bhi yahi intiKHab niklega


Source: Book : Nuskha Hai Wafa (Kulliyat-e-Faiz) (Pg. 74) Publication : Educational Publishing House (2009) Edition : 2009

Leave a comment

+