Subscribe to our newsletter and get our newest updates

Hafeez Shahid

  • Ghazal


kaThin haalat mein apne iradon ko jawan rakhna


kaThin hālāt meñ apne irādoñ ko javāñ rakhnā
hameñ aatā hai dil meñ sho.ala-e-ġham ko nihāñ rakhnā

akele ghar meñ kaise vaqt kāTo.ge tan-e-tanhā
koī tasvīr laTkā kar sar-e-dīvār-e-jāñ rakhnā

hamārī fikr tum chhoḌo hameñ ye kaam aatā hai
añdheroñ meñ basar karnā nazar meñ kahkashāñ rakhnā

ajal aur zindagī kī dostī ik harf-e-bātil hai
bahut dushvār hai paanī pe buniyād-e-makāñ rakhnā

chaman par ek din fasl-e-ḳhizāñ kā raaj bhī hogā
abas hai dil meñ armān-e-bahār-e-jāvedāñ rakhnā

na jaane is meñ poshīda haiñ us kī hikmateñ kyā kyā
hamesha gardishoñ meñ ye zamīn-o-āsmāñ rakhnā

kahāñ āsān hai ahl-e-suḳhan kī bhiiḌ meñ 'shāhid'
judā auroñ se apnā tarz-e-guftār-o-bayāñ rakhnā

kaThin haalat mein apne iradon ko jawan rakhna
hamein aata hai dil mein shoala-e-gham ko nihan rakhna

akele ghar mein kaise waqt kaToge tan-e-tanha
koi taswir laTka kar sar-e-diwar-e-jaan rakhna

hamari fikr tum chhoDo hamein ye kaam aata hai
andheron mein basar karna nazar mein kahkashan rakhna

ajal aur zindagi ki dosti ek harf-e-baatil hai
bahut dushwar hai pani pe buniyaad-e-makan rakhna

chaman par ek din fasl-e-KHizan ka raj bhi hoga
abas hai dil mein arman-e-bahaar-e-jawedan rakhna

na jaane is mein poshida hain us ki hikmaten kya kya
hamesha gardishon mein ye zamin-o-asman rakhna

kahan aasan hai ahl-e-suKHan ki bhiD mein 'shahid'
juda auron se apna tarz-e-guftar-o-bayan rakhna


Leave a comment

+